Россе хьал тоадара тӀехьа, лоархӀаме моттиг дӀалоац къаман Ӏадаташа
Мехка хьал тоадара тӀехьа, Россе дахача къамий Ӏадаташ лархӀаро йоккха, лоархӀаме моттиг дӀалоацилга белгалдир вай Мехкадас Келаматанаькъан Махьмуд-Ӏаьлас. Тахан эттача атта йоацача хана, вай мохк деналца духьаллатташ хилар белгалдир цо.
«Россе бахархой беркате Ӏадаташ, оамалаш йолаш, цхьаккха хана ца бохаш хьабаьхкаб»,- аьлар республикан кулгалхочо. Келаматанаькъан Махьмуд-Ӏаьлас дийцар, Россена юкъе лоархӀаме дакъа дӀалоацаш йолча ГӀалгӀай республике тхьовра денз хьадахьаш дола къаман Ӏадаташ, оамалаш лораяр, кхыдолча къамий культураца эздел леладар чӀоагӀа лоархӀаме долга.
«Вай дерригаш цхьан боккхача мехка – Россе дахаш, цун сий лораде дезаш да тахан. Вай низ хилар, тайп-тайпара культураш йолаш вай дале а, цхьан хӀаман тӀехьа хилар, барт, бувзам лелабар да. Цу хӀамаша чӀоагӀду вай гӀулакх», - тӀатехар вай Мехкадас.
БӀаьшерашка денз хьайоагӀа гӀалаш латтача гӀалгӀай мехка дӀайихьа «ХӀарма» яха кхетаче вайна массанена дикан хургхилар белгалдир мехка кулгалхочо. Мехкада дог тийша ва, Россе къамаш вӀашкаозаш, бувзам, барт чӀоагӀбергбола, къамашта юкъера Ӏадаташ лархӀара тӀахьехаш дола, кхетаче доаржадаь дийцача хӀамашка гӀолла керда, беркате наькъаш хьаделларгхиларах.
