Мехкада: Хоржамашка кийчо яра болх хила безача боараме дӏахьу
Тов бетта 18-ча денгара 20-ча денга кхаччалца – кхаь дийнахьа латтаргдолча хоржамашта кийчо яра болх чаккхенга кхача гарга ба. Россе Паччахьалкхен Думан ийслагӏча кхайкарала, Халкъа Гуллама бархӏлагӏча кхайкарала депутаташ харжа безаш ба мехкахой. Таханара керттера декхар - хоржамий болх боаггӏача боараме дӏагӏоргболаш лерттӏа кийчо яр.
«258 645 харжархо ва тахан вай мехка. Бокъоно дӏадеххача тайпара ший гӏулакх чакхдаккха аьттув хила беза хӏаране. Цунга хьежжа тахан хоржама моттигаш, иштта техника кийчъеш, беррига нах дӏаязбеш, комиссе доакъашхошца болх дӏахьош ба. Къаьстта терко е еза кхерамзленца дувзаденнарашта. Хоржамаий болх дӏахьоргболча кабинеташка хьожаш, теркалдаь кхоачамбоацараш юстардоахаш ба республике. Хоржамий моттигашка кийчо ярал совгӏа, хила дезача хоржамех дар дика довзаш хила беза бахархой. Из болх дӏахьош ба хоамий оагӏонашка, Хоржама комиссе «бӏайхача бувзамга» гӏолла», - белгалдир вай мехкадас Келаматанаькъан Махьмуд-Ӏаьлас.
Республикан кулгалхочо теркалдечох, цу оагӏонцара кийчон болх боаггӏача боараме, цхьаккха гӏалатло йоацаш дӏабодаш ба тахан. Тов бетта 18-гӏа ди хьакхачале, юхедиса гӏулакхаш чакхдоахаргда. Мехкадас белгалдир, деррига хӏама тӏехдика кийчо яь, бокъонаш лораеш, кхерамзленца дувзаденнараш лертӏа долаш хила дезилга.
