Овшанаькъан Руслан, 71 шу дизарца, даькъалавийцар Мехкадас
Мехка хьалхарча президентага, Советски Союза Турпалга Овшанаькъан Русланага, цун 71 шу дизарца, из даькъалавувцаш хоам бахьийтар вай мехкадас Келаматанаькъан Махьмуд-Iаьлас. Цо белгалдир, Овшанаькъан Руслан, мехка хьал геттара хала долча хана, цун хIама тоадара тIехьа дукха къахьегаш лаьтталга.
«Овшанаькъан Русланах, Даьхен визза воI хиларца, массанена масал хиннад. Эггара халагIча хана, республиканна кулгалде эттар из, ший низ дIа мел кхоачар деш, лаьттар цун мехка тоае гIерташ», - йоах Мехкадаь хоама тIа. ДIахойодача хана а, иштта хьинаре Даьхен гIулакха къахьега, иразе, беркате, могаш-маьрша волаш дуккхача шерашка ваха даькъалавийцар Мехкадас къаман хьалхара президент.
1954-ча шера ардара бетта 29-ча дийнахьа ваьв политик, тIемхо, юкъарлон оагIонцара болхло вола Овшанаькъан Султана Руслан. Буро тIарча лакхерча эскара кулгал деча тIема училище деша ваьгIар из. Лакха майрал, денал гойтарах Афганистане Советски Союза Турпал яха цIи елар цунна. 1993-ча шера тушоле беттагара 2001-ча шера оагIой беттага кхаччалца йолча хана, ГIалгIайчен хьалхара Президент волаш лаьттар из, хIаьта 1991-ча шергара 2014-ча шерга кхаччалца СНГ паччахьалкхений кулгалхой Совета тIемхой - интернационалистий гIулакхех йолча комитета кулгал деш хилар.
