Мехкарча кадетски корпуса 32 шу дизара хетадаь къамаьл дир вай Мехкадас
Цхьорой ӏаддала цӏерах йолча кадетски корпуса 32 шу дуз тахан. Цу чу болх беш, дешаш бараш даькъалабувцаш, къамаьл дир вай мехкадас Келаматанаькъан Махьмуд-Ӏаьлас. Республикан кулгалхочо белгалдир, Даьхенцара безам, лерхӏам лакха бола тӏехье ураоттаяра тӏехьа болх дӏахьош вай мехка цаӏ мара йоаца моттиг из йолга. 32 шера 801 курсант арахийцав цу моттиго. Мехкадас теркалдечох, из дешара моттиг дуккхача вай кӏаьнкий дегӏаца Даьхенцара безам чӏоагӏбеш, деналца, майралца, яхьанца йола оамалаш чӏоагӏъеш хилар.
«Укхаза къонабараш духхьал дийша ӏац. Боккхагӏбарашца лерхӏам болаш, нийсхон тӏехьа болаш хила ӏомабу цига къонабараш. Тӏема декхарех долча гӏулакхаца шоай вахар хеттад цигара арабаьннача дуккхабараша. Кадеташ болча хана, дегӏаца чӏоагӏденна дика, сийдола гӏулакхаш лорадеш, тахан Даьхен хӏама лорадара тӏехьа къахьегаш ба уж. Хьехархоша, хьехамчаша цар дегашка чӏоагӏдаь хӏама да из. Къонабарашцара хӏара дийнахьара болх ба из, нийса никъ харжа, моллагӏча хӏаман духьалъотта, яхь йолаш хила ӏомабу уж цига», - аьлар вай Мехкадас.
Дешара оагӏонца лоархӏаме моттиг дӏалоацаш хиннай кадетски корпус массахана. Боккхача мехка, вай республикан хӏама тоадара тӏехьа ураотта еза тӏехье я цу чу тахан кхеер.
Шоай дешара лакха терко еш, вӏаший оагӏув хьаллоацаш, дика оамалаш дегӏаца чӏоагӏъяра тӏехьа къахьегаш хилара тӏахьийхар уж Макшарипа Махьмуд-Ӏаьлас.
Хьехархой, хьехамчаш могаш болаш, тахан санна хьинаре, бехктокхаме къахьегаш, корпуса лоархӏаме ӏадаташ лорадеш шоай болх дӏабахьа даькъалабийцар.
