Наркотикашцара хьал дувцача дакъа лаьцар вай Мехкадас
РФ чухьарча гӏулакхех йолча министерствон хьалха латтача Колокольцев Владимира кулгал деш, дӏайихьача наркотикашта духьале лоаттаеча Паччахьалкхен комитета кхетаче дакъа лоацаш хилар вай мехкада Келаматанаькъан Махьмуд-Ӏаьла.
«Наркотикашта духьаларча политикаца дувзаденна хаттараш дар кхетаче доашхаш хиннараш. ФСИН, Унахцӏенон моттигашта юкъерча цу оагӏонцарча бувзамах, наркотикаш цаяржийтара духьала лоаттабеча балхацарча керттердарех, иштта цу доккхача зулама наькъаш тедаш кхоачашде дезарех дийцар гулбеннараша», - йоах тха газетага байтача хоама тӏа мехкадаь зарбан болх лелабераша.
Наркотикаш вай мехка хьачукхухьарий гӏулакх дохадара тӏехьа, къахьега дезилга белгалдир кхетаче, ма могга чӏоагӏбе безаш ба из болх. 2025-ча шера дӏабихьача балхах, иштта укх шера дӏахойодача хана кхоачашде дезарех дийцар цига.
