Келаматанаькъан Махьмуд-Ӏаьлий кхетаче хилар Наьсарен мэраца
Дӏадахача кӀира, балхаца ювзаенна кхетаче хилар ГӏалгӀайчен Кулгалхочун Келаматанаькъан Махьмуд-Ӏаьлий, Наьсарен мэраца Оздой Русланаца, цига дийцар мехка эггара йоккхагӀа йола шахьар Наьсаре дегӀайоалаярах. Керттера хаттараш дувзаденна дар шахьара вахара-экономически хьал тоадарца.
Махьмуд-Ӏаьлас белгалдир, шахьара даькъ тӀа, вахара-коммунальни гӀулакхашта йола моттигаш хьакхолла езилга. Цо иштта аьлар, из вӀаштӀара даьча цӀеношка бахача наьха кхерамзленна, царна дика хьалаш, цу юкъе лифташ а долаш, хьакхоллара эшаш хилар.
«Шахьара боахама нийса кулгал дара эшар да бехктокхаме, къахьегаш хилар. ЛоархӀаме да шахьара бахархошта хетар лоархӀаш хилар а», - аьлар ГӏалгӀайчен Кулгалхочо.
Ший аргӀагӀа, Оздой Руслана карарча шера де лерхӀачун план гойтар. Царна юкъе да йоал гулъяр, кредитах доалла декхар дӀадалар, бахархой доалахьара фусамаш дӀаязъяр, шахьар тоаяр.
Къамаьл чакхдоалаш, ГӏалгӀайчен Кулгалхочо белгалдир, шахьара кердача кулгалхочунна хьалхашка дукха де дезараш хилар.
«Наьсаре дика дегӀая езаш а, ший бахархой гӀадбига безаш а я», - аьлар цо.
