Мехкада: Беркате хилда дешара керда шу!
Кердача дешара шерцара хьалхара гургал тохаргба тахан мехкарча ишколашка. 8,5 эзар гаргга долча вай берашта къаьстта лоархӏаме ди да таханардар – ишколан коа хьалхара гӏа дӏачубоаккхаш ба уж. Дӏахо царга хьежараш дукха да: кердадараш, совгӏаташ, новкъостий. 85 эзар совгӏа бераш да вай мехкарча ишколашка дешара шу дӏадоладераш.
«Хьамсара бераш! Доккхача декхарашка кхача хьожаш, къахьегара тӏера долаш, хилда шун вахара денош. Тахан оаш хьаийцар, ӏомадаьр кхоанарча боккхача новкъа накъадаргда шоана. Укх шера хьалхарча классе бахараш даькъалабувц аз ишколера вахар довза безам хиларца, хӏаьта дийша баьнна арабоаларий аьттув хилба пайданегӏа, дикагӏа бола никъ харжа, доккхача толамашка кхача. Беркатах, аьттонах, дукхача дикача гӏулакхех диза хилда керда дешара шу!» - аьлар вай Мехкадас, дешархошка къамаьл деш.
Республикан Кулгалхочо белгалдир, дешара оагӏонцара гӏулакхаш дикагӏа тоаде гӏерташ, тӏехьарча шерашка мехка тӏатеӏӏа къахьегилга. «Дешар», «Демографи» яхача къаман проекташка гӏолла, 25 эзар бера моттигаш луш 49 ишкол хьалъяьй мехка, иштта 10 эзар совгӏа бер чуэцаш 50 берий беш, 8 эзар совгӏа сага болх бе моттигаш хиннай.
Мехкадас теркалдир, эггара керттердар тӏехдика дешаш чакхбалар, хьехархоша шоай декхараш дизза кхоачашдар долга. Мехкарча хьехархошта баркал аьлар республикан Кулгалхочо беркате, доккхача дикашка кхача, дукха хӏама доаржаде ловш йола къона тӏехье ураоттаеш хьинаре къахьегарах.
