Келаматанаькъан Махьмуд-Ӏаьла: ТӀехьарча 7 бетта 94 спорта кхетаче дӀайихьай вай мехка
Спорта кхетаченаш дӀакхахьар вай мехка дикка айденнилга теркалдир Мехкадас. 2024-ча шера 7 бетта 94 спорта кхетаче дӀайихьай мехка. ДӀадахача шера хиннарел, 16 дукхагӀа хул уж.
«Царна юкъе я дзюдох, ший лоӀамерча латарах йола йоккхий турнираш, тайп-тайпара спорта оагӀонаш хьаллоацаш йола тӀема операцен доакъашхошта хетаяь яхьаш. Къаьстта белгалъе еза, гӀалгӀай паччахьалкхен 100 шу дизара хетаяь къамашта юкъера боксах йола яхь. Боккхача мехка бахархой хьожаш, дӀайихьа йоккха кхетаче яр из», - белгалдир вай мехкадас Келаматанаькъан Махьмуд-Ӏаьлас.
Мехка кулгалхочо иштта хьоахадир, республике «Демографи» яхача къаман проектага гӀолла керда спорта моттигаш хьалъеш латтилга, мехкарча спортсменашта, тренерашта гӀо деш болх дӀахьолга.
«РФ президента Путин Владимира могадаьр хьаллоацаш дӀадаха гӀерт вай: 2030-ча шера 70% Россе бахархой спортацара бувзам лакхача боараме лоаттабеш хила беза», - тӀатехар вай Мехкадас.
