Кердача 15 автобуса дIоагIаш дIаделар вай Мехкадас
Вай Мехкадас 15 кердача, ишколашта лаьрхIача автобусий дIоагIаш дIалуш; лоархIаме кхетаче хилар мехка. Ишколашкарча автопаркай хьал тоадеш, федеральни программага гIолла кхаьчар республике керда, дикагIа йола автобусаш. «Сердалога» из хоам бир мехкадаь зарбан болх лелабераша.
Эггара чIоагIагIа эшача моттигашка дIа-хьа йийкъар уж. Цу юкъе я Наьсарера, Илдарха-ГIалий тIара, Шолжа-Шахьарера, ЖIайрахьара, Эбарга-Юртара, Йоккхача Ачалкхра, Дабе-Юртара ишколаш. Иштта, кадетски корпуса, «Олимп» яхача ишкола, тайп-тайпара оагIонаш чулоацаш йолча лицейна, спортацара бувзам хьаллоацаш йолча ишкола кхаьчар дукха сатийса керда автобусаш.
Вай мехкадас Келаматанаькъан Махьмуд-Iаьлас белгалдарах тарра, берий хьал аттачахьа даккхара, шин сменах дешаш дола гIулакх дIадаккхара тIехьа дIахьош болх ба из. Мехка Президент волча Путин Владимира, Россе Паччахьалкхено доккха гIо лоаттадарца из болх дIабахьа аьттув боал вай тахан», - белгалдир вай Мехкадас.
Тахан вайна массанена гуш да, дешара оагIонцара хьал дикка тоалуш доагIилга. 2019-ча шера денз «Дешар» яхача къаман проектага гIолла 48 таханарча ханага хьежжа йола керда ишкол, 50 берий беш хьалъяьй мехка. Ишколашкарча автопаркашка 144 керда автобус хьачуйоалаяьй. Керда, дика автобусаш хилар цIагIа берашка хьежаш багIача даьга, наьнага а кIезигагIа саготдайташ да. МоллагIча яхьашка, кхетаченашка, олимпиадашка дакъа лаца болхаш хилча; цIена, лерттIа болх беш йола автобус хилар лоархIаме да. Вай берий хьал аттачахьа даккхара тIехьа боаккхаш цхьаькха лоархIаме гIа ба из.
