Мехка латташ дола урдув диазза лакхденнад
06.08.2024 14:51
40 эзар сома тӀа лаьтта вай мехкара урдув, хӀанзчул тӀехьагӀа 150 эзар сом хургда. Маьждигашкара имамаша, динах боахкача наха, гулбенна, баь соцам ба из. Из хоам «Сердалога» бир цу юкъе хиннараша.
«Урдув хувцара гӀулакх массехк бетта дувцаш лаьттад, маьждигашка хьаухача бахархошца. ХӀара юртарча наха хетар керте эцаш, яь чӀоагӀо я из. Кхетаче дӀайихьа, белгалдир уж шеддар», - йоах тхога кхаьчача хоамо.
Дийшача наха теркалдир, хӀанзалца лаьтта 40 эзар сом урдув маьре йодача кхалсага хьош мел йолча хӀамашта маьхаш тӀакхетарах, дикка дайденнилга. Из бахьан долаш, хилар из хувцам. Иштта йита дӀайодача кхалсага доагӀаш дола ахча 50 эзар сома тӀа соцадир.
Теркалде деза, цу хувцамех вай бахархоша айдаь дувцаш латтилга.
