Наьсара-Кертера яха цӀи йола урам цӀенхашта тоабеш ба
Наьсара-Кертера 3 км латта урам тоабеш, боккха болх дӀаболабаьб мехка. «Кхераме доаца дика наькъаш» яхача къаман проектага гӀолла дӀахьош беркате болх ба из.
Бахархой из никъ тоабарга хьежа дикка ха яр. Беха латтача наькъо хало йора дӀа-хьа лелача машинашта.
Газа а хин а турбаш хийца баьнна, хӀанз никъ тоабе эттаб болхлой.
«Асфальт билларал совгӀа, гӀашлой никъ тоабеш доахк тхо», - белгалдир шахьара дас.
«Кхераме доаца дика наькъаш» яхача проектага гӀолла 2024-ча шера Наьсаре тоабе лерхӀ 9 никъ. «Наьсар-Кертера яхача урам тӀара никъ тоабаро дикка аттачахьа доаккхаргда машинашца, гӀаш леларий хьал», - аьлар шахьара да волча Йовлой Урусхана.
Наькъаш боаггӀача боараме тоадаь латташ хилар чӀоагӀа лоархӀаме да, наькъашкара хатараш ма хулла лаьгӀдалийтара тӀехьа дӀахьоча балха юкъе.
