Гӏалгӏайчен киберполице гаьннара куташ еча наха деш дола зулам техкар

«Бизнес лелаеча нахацара гӏулакх цо дӏахьора дика даьржача бувзамашка гӏолла. Цо царгара эцар совгӏата луш дола тускараш, цу чу чубилла оалаш хиннад цо, тӏехьа йоазув а дийя, 20-25 эзар сом чудола каьхата ботт. Дӏахо цо дӏадохьийташ хиннад уж йохкаш барашта доацаш, цар хьаяйтача хӏамай маьха дола харц квитанци. Цо тувлабаьча бизнес лелаераша шоашта ахча хьадайтадий а ца хьожаш, цун заказаш дӏадохьийташ хиннад. Бокъонаш телхаеш хиннача кхалсага, совгӏата тускараш таксисташка гӏолла моллагӏча адресах хьаэцаш хиннад. Из таксеца хьадахьача юкъа бувзаме йоалаш хиннай водителашца, ший цӏагӏара хьал хувцадаларах уж теша а бийя, тускар водителашта а дите, конверта чу доалла ахча ший банка карта тӏа хьатӏадайта оалаш хиннад», - аьлар «Сердало» газетага Гӏалгӏайчен МВД зарбан болх лелабераша.

Карарча шера бӏаьсти цо лаьрхӏар динца дувзаденнача гӏулакхашка гӏолла шийна пайда бе. Мархий бетта совгӏаташ деш хилара ӏадат довзаш йолча цо лаьрхӏар бизнес лелаераш ӏехабе. Гӏалгӏайчен, шоай доалахьара бизнес лелаю ши кхалсаг ӏехайир, царгара 68,5 эзар сом ахча лочкъадеш.

Из гӏулакх тохкаш, Россе ОМВД Наьсаре гӏолла болча тохкама болх лелабераша хьадийллар РФ УК 2 д. 159 ст. уголовни гӏулакх (куташ лелаяр). Из тохкама болх дӏахьош, цу тайпарча харцахьарча балхаца къовсам лелабара болча болхлоша техкар из йола моттиг. Уж бахар Краснодарски крае командировках, цар хьалаьцар Дински кхале яхаш йола из кхалсаг ший цӏагӏара.

Гучадаьлар цу кхалсага хьалхагӏа иштта зуламаш леладарах суд яь хилар. Лоткъам эцаш, цо ма дарра дарий дир, ше бехке хилар тӏаэцаш. Цо дийцар 2025 шера оагӏой бетта денз 2026 шера бекарга беттага кхаччалца, Татарстане, Гӏабартой-Балкхаре, Ростовски областе, Кубане ше ялхазза даьча зуламах. Цо наха даь зулам 220 эзар сома маьха да.

Хӏанз бокъонаш лораераш из гӏулакх дӏахо тохкаш ба.