«Гӏалгӏайчен ветеранаш» яхача тоабо «Россе Кубкера» дошув дера
Укх деношка Шолжа-Гӏалий тӏа дӏайихьар мехкашта юкъера «60+» яха зӏамигача футболах йола яхьаш, Гӏалгӏайчен тоабо лакха толам баьккхар цига. Цу коталонца, тоаба хьалхалатта Султиганаькъан Абубакара даькъалавийцар Илдарха-Гӏалан кулгалхочо Дидиганаькъан Ахьмада.
«Сердало» газетага, Илдарха-Гӏалан администраце зарбан болх лелабераша ма аллара, шахьара кулгалхочо еррига зӏамигача футбола тоаба, шийна керте 65 шу даьнна Султиганаькъан Абубакар а волаш, хоастама дешашца белгалъяьккхар. Шахьара кулгалхочо «Гӏалгӏайчен ветеранаш» яхача тоаба кулгалхо даькъалавувцаш белгалдир, цун хьинар, цо юкъарлон хаттараш кхоачашдеча дакъа лоацаш хилар, ма хулла дукхагӏа из цу балха мугӏаре хилар ловш.
Белгалду, Башира Абубакар ший тайпара, массайолча оагӏорахьара вахара никъ лелабеш хьавоагӏа саг ва. Из ва дика вовзаш вола юкъарлон болхло, дин леладу саг, дукхача хана денз къаьнара гӏирсаш гулдеш вар.
Мах бола тӏехьале цо каст-каста лу музейна, цу даькъе Илдарха-Гӏалан исбахьален искусствай музейна а. Из бахьан долаш, 2025 шера гӏалгӏай къаман культуран тӏехьале лораярах, цунна лаьрххӏа йола шахьара сийдола вахархо, аьнна, цӏи елар.
