Гӏалгӏайчен кагирхой Комитето наркоманена духьалара болх дӏахо дӏахьу
Гуманитарно-технически колледже Гӏалгӏайчен кагирхой гӏулакхах йолча Комитето вӏашагӏъелла лекци йийшар. Из лаьрхӏа я республикера наркоманеца дувзаденна хьал тоадара. Кхетаче дӏахьош яр студенташта наркоманех хьадоала зулам довзийтара, цо сага могашал йоаеш хилар царна хьалхадаккхара.
«Кхетаче дӏахьош дакъа лоацаш хилар Гӏалгӏайчен МВД наркотикашца къовсам лоаттабара йолча урхаллен болхло. Цо дийцар студенташта цу ийрчача гӏулакха кагирхой юкъебоахаш хиларах, наркотикаш лелаярах, уж йоаржаярах болча бехктокхамах.
Кагирхой гӏулакхех йолча Комитетера цига дакъа лоацаш вар Авсажанаькъан Мухьмад. Ше къамаьл деш цо белгалдир, кагирхой тахан кхоллама болх дӏабахьара, лоӏамхой проекташка дакъа лацара, кхы дӏахо дола дика гӏулакхаш леладара йоккхий таронаш хиларах. Цо иштта хьалхадаьккхар мичахьа ваха веза, нагахьа санна ший е цӏагӏарча сага цу даькъ тӏара хьал нийсденна хилча.
Къамаьл дика дӏадихьар бераша, юха а ца озалуш, шоай хаттараш дир, шоашта хетар довзийтар», - аьлар «Сердало» газетага Гӏалгӏайчен кагирхой Комитете.
Тхоца къамаьл даьчо белгалдир, республике кхувш боагӏараш воча гӏулакхах лорабара болх дика вӏашагӏбелла хилар. Дӏайихьа кхетаче цхьа дакъа мара дац, де лаьрхӏачунга диллача. Кагирхой кхетаченаш кхы а дӏахьоргья. Уж ерригаш а лаьрхӏа я кагирхой хьаллацара, цар унахцӏена вахар леладара, уж дика дегӏабоалабара.
