Маяк-12» яхача ха тӀа даьнна дов дӀакъаьстар, ГӏалгӀайчен вахархо лоацаш
ГӏалгӀай мехка лаьцар 26 шу даьнна МагӀалбик-шахьара вахархо, из полице болхлошта тӏакховдарах уголовни гӀулакха юкъевахар. ГӀР гӀолла йолча РФ СК СУ Тохкама отдела цунна бехк бир РФ УК 2 д. 318 статьях, яхаш, дийцар «Сердало» газетага моттигерча Тохкама комитете.
Из нийсделар 2026 шера бекарга бетта 4-ча дийнахьа, эггара дукхагӀа машинашца нах лелача «Наьсаре-МагӀалбик-Махьмад-ХитӀа - Шолжа -ГӀала» оала машиний наькъаш вӀашагӀкхетача. «Маяк-12» ха тӀа латтача ДПС болхлоша соцайир, массаза санна шоай болх дӀахьош, чухьажа лаьрхӀа машин. Бакъда цох хьахилар уголовни гӀулакх.
Водитель раьза хиланзар машина каьхаташ, бокъо дӀагойта, къамаьлагара дӀадоладелар, цу юкъевера ДПС тоабан командир гӀонча. Из саг соцаве гӀертача цунна юхьмараш тӀа, дикка лозавеш, бийнаш дийттар. Из сага могашала ӏаткъа зулам санна лаьрхӀар.
Судо лаьрхӀар из саг чуволлар нийса да; зулам ма дарра техка даллалца, аьнна. Из зулам бахьан долаш, цунна дикка набахта валла ха тоха тарлуш я. Уголовни гӀулакх дӀахо дӀахьош, хиннар тохкаш да.
