Магасерча кванторианцаша толам баьккхар киберкхерамзлен яхье
Республикански берий «Кванториум» яха технопарк толашагӏчарца хилар халкъашта юкъера «Инфобез» яха киберкхерамзлен яхь дӀахьош, яхаш, дийцар «Сердало» газетага цу дешара моттига администраце.
«Шоашта ховш дар гойтар 10-16 шерашка кхаьчача бераша. Царна хьалхашка оттадаь декхар дар хоамий технологех, хоамий кхерамзленах йолча темах долча хаттараша дӏадехар кхоачашдар. Юххера Тоачанаькъан Азамата, Тебой Адама, Йовлой Билала, Йовлой Ахьмада, Поаланкой Ӏаддал-Малика, Албохчанаькъан Зубейранна, Йовлой Мухьмада толама кхоалагӀча моттига дипломаш делар», - аьлар хоамо.
Хьаькъале яхьаш дӀаяхьаро таро елар ӀТ- технологешцара безам совбаккха, хьаькъале уйла е, иштта таханарча Интернета боккхача бувзама таронаш, иштта хоамий кхерамзлен керттердараш довзийта.
«Даькъаладувц бераш цар толамашца, кердача коталонга кхача низ кхоачалба цар»,- аьлар цар кулгалхочо Янданаькъан Салмана.
