Магаса кванторианцаша шоаш хьагойтар «Доккхий гӏулакхаш» яхача яхье
Республикан «Кванториум» яхача берий технопарке дешаш долча бераша шоаш дикача толамашца гойтар Ерригроссийски ӏилман-технологически проектий «Доккхий гӏулакхаш» яха яхь йолча хана, яхаш, дийцар «Сердало» газетага дешара моттига администратора Налганаькъан Мадинас.
«Дешархошта юкъера яхьаш дӏайихьар «Олимп» яхача хьаькъал долча берий лицея-центра даькъ тӏа. Технопарке ӏомалуш йолча Баркинхой Раянас Гран-при яьккхар «Болх харжарах йола чат-бот» проектах. Албохчанаькъан Зубейра котало яьккхар «Хьаькъал дола микромехкал» яхача балхах. Колой Тимура, Йовлой Мухьмада 3-гӏа моттиг кхаьчар дешархошта йола «Гӏалгӏай Республикан физикан, математикан «Физматлаб» веб-сайт» яхача проектах. Цу совгӏаташа хьагойт бераша деш дола ӏилма-тохкама балхаш, уж накъадоалаш да ӏилман-технически декхараш кхоачашдеча», - аьлар тхоца къамаьл даьчо.
Хӏанз котбаьннараш, совгӏаташ даьхараш таро йолаш ба Ерригроссийски яхь дӏаяхьа: кхелахой лаьрххӏа дола декхар кхоачашде, къаьстта ховр тохкаш дола къамаьл дӏадахьа.
«Кванториум» технопарка кулгалхоша, ерригача хьехархой тоабо даькъалабувц котбаьннараш цар толамашца.
