Гӏалгӏайчен «Оаздик» лагере салоӏаш да Липецки областера бераш
Гӏалгӏай мехка салаӏа ера, Липецки областера 27 саг чувоагӏаш йола тоаба. Цар шоай ахкан ха дӏахьоргья Гӏалгӏайче. Эггара хозача ӏалама моттиге уллача Жӏайрахьа кхален «Оаздик» яхача унахцӏенон лагере хургба уж салоӏаш. Республике хьаьший тӏаэцаш хилар дешара, ӏилман Министерствон викалаш, уж салоӏаш хургболча моттиге кхаччалца дӏабигар цар.
«Берашта цига довзаргда дукха дика хӏама, гонахьара Гӏалгӏайчен хоза ӏалам, керда вӏашагӏкхетараш дӏахьоргда, шоайла бовзар хургда. Оаха лаьрххӏа йола терко лоаттаю кхерамзле йолаш, дика салоӏам вӏашагӏболлаш, цига мел эшаш дола хьалаш хьакхоллаш, хӏара бер гӏаддаха, безамца из ха цига дӏахьош хилийтара», - аьлар «Сердало» газетага Гӏалгӏайчен дешара Министерстве.
Гӏалгӏайче цар дӏахьош йола салоӏама ха - из я кердадараш довзара, доттагӏал тассара йола ха. Кавказа лоамашка Липецка бераш салаӏарал совгӏа, керда доттагӏал корадаь, шоайла культураш йийкъа, дикача уйлашца цӏагӏоргда шоай мехка.
