«Дагалоаттама лувкхера» яха литературан сахьат дӀадихьар Наьсарерча РДК
Наьсарен кхален культуран ЦӏагӀа дӀадихьар «Дагалоаттама лувкхера» яха литературан сахьат, из хетадаь дар цӀихезача гӀалгӀай, Россе йоазонхочунна Чахкенаькъан Идриса Саӏида кхоллама. Кхетаче дӀайихьар «Дешархошта культура» яхача Ерригроссийски боахамашта юкъера культуран-дешара проекта чуйоагӀаш, из лаьрхӀа яр кхувш йоагӀа тӀехье къаман культурага яккхара, культуран тӀехьале лораяра.
«Программанна чудоагӀаш дар, Чахкенаькъан Саӏида дукхагӀа бовзаш, лоархӀаме бола кхоллам доакъашхошта дагабохийтар. Литературан сахьат вӀашагӀделлараш бар тха болхлой Эккажанаькъан М., иштта Исмейланаькъан Л. Цар къахьегамца кхетаче дика хилар, дукха хӀама довзийташ. Доакъашхошта байзар Чахкенаькъан Саӏида кхоллам, цун вахарах лаьца дийцар, цул совгӀа цун литературан тӀехьале яйзар цхьацца долча дешара доакъошка гӀолла, цун чулоацам бийцар», - аьлар «Сердало» газетага Наьсарен РДК.
Чахкенаькъан Идриса Саӏид - из юкъе воацаш го хала дар Россе а, ГӏалгӀайчен а литератураy дакъа. НачӀал дола прозаик, поэт, драматург, таржамхо, публицист, юкъарлон болхло волча цо доккха дакъа юкъеденад къаман культура дегӀайоалаеш.
Чахкенаькъан Саӏида кхоллам кӀоаргга къаман тӀехьале, кӏийле гойташ ба, цунца йовза йиш я къаман белгало, гӀалгӀай метта мах бараш, сага дег чура дикал, цун оамалаш. Цун кхоллам - из дӀаяхача, хургйолча ханий бувзам ба, цо лораду гӀалгӀай къаман Ӏадаташ. Тахан вайна лоархӀаме да цар цӀераш дагахьа лоаттаяр, цар шоай кхолламца йитай вай вахаре мах баь варгвоаца къаман культуран, исторен лар.
