ГӏалгӀай мехкара ашараш езараш, Гарри Поттера дунен тӀа кхоачаргба
Саькура бетта 12-ча дийнахьа, Гарри Поттера дуне дикагӏа довзийташ, ашарашца дувзаденна ший тайпара безаме хьал кхоллалургда вайцига.
Цу дийнахьа, дукхача хана денз сатийса, Хамхой А. цӀерагӀча ГӏалгӀайчен Паччахьалкхен филармоне симфонически оркестра концерт хургда, «Гарри Поттера тамашийнача дунен чу» яхаш. ХӀарнена дика йовзаш я цӀихеза композицеш, цкъа мукъагӏа «дийна висача кӀаьнкага хьежачунна», уж дӀалокхаргья кердача тайпара. Концерт дӀахьоргда Яндарерча «Олимп» яхача лицее.
«Низ болча оркестра екар хургда цига хозаш,хӀара аккорд ший дувцар долаш, истори долаш я. Саг чувала бокъо йоацача хьунагӀа нийслуш дола тамашийна хӀамаш, баьцаш кхехкае Ӏомабеш йола урокаш– фаьлгашкара еррига книжкай оагӀонаш хьалхашка оттаргья», - аьлар «Сердало» газетага цигарча зарбан болх лелабераша.
Из концерт хургда салаӀара керттера моттиг дӀалоацаш, тамашийнача хӀамашка хьожача юкъа сапаргӀатадоалаш. Паччахьалкхен филармоне оркестро ший наӀараш хьаелларгья ше езарашта, хозача мукъамашка ладувгӏа таро а луш. Из оаз дукха дег чу латтаргья хьажархошта.
