Яхьаш дӀайихьар Муроме. Лакхача говзалца массанена юкъе белгалваьлар вай мехкахо. Укх шера Россе чемпионате дошув даьккха хиннача Мухьмада массанена дӀахайтар, коталонга долха наькъаш карадерзаде ше дӀахо а кийча волга.

Иштта дикка белгалваьлар Россе вӀашагӀтехача тоабан доакъашхо вола ЦӀечой Адам финалага бодача новкъа.

«Россе Кубок яккхара яхьаш геттара хала лоархӀарех я, цу юкъе дакъа лоацараш дӀаьхача шера хорж, - белгалдир Ӏаддалхой Федерацен кулгал деча Йовлой Мухьмада. - Хана воккха веце а, боккхийчарна нийса говзал йолаш лаьттар Мухьмад яхьашка, цунга хьежжа, котало а йоагӀаш кхаьчар цунна. Федерацегара доккха баркал оал аз спорта гӀулакхех йолча вай министерствон, къаьстта цу оагӀон кулгал деча Белхарой Руслана, массахана гӀо деш, оагӀув хьаллоацаш хиларах. Цу гӀулакхо геттара дог айду вай спортсмений».

Цу коталоно хьагойтар, Ӏаддалхой вай мехкара ишкол ший гӀулакх лакха леладеш йолга, хоза масал да из къонача спортсменашта.