Урама хьал во хиларах, Къаман фронтага леткъар Магӏалбикера бахархой
Магӏалбикерча Тенкенаькъан цӏи лелаеча урамера бахархой леткъар Къаман фронтага. Урама хьал геттара воча дийрза да, аьнна, белгалдир цар. Никъ нийсса юкъера беха ӏочубахаб, дӏахо колд, кӏоагаш, ораш латт; дӏаваха хала долаш.
«Чӏоагӏа хала лел цу наькъ тӏа гӏолла машинаш. Наькъа юккъе латтача хишта, кӏоагашта гобоахаш дӏааха безача бахархой хьал кхераме да къаьстта боад эттача. Хӏара денна цига гӏолла ишколе аха дезаш да дукха бераш. Цул совгӏа, цхьаькха кхоачамбоацараш да цига ӏатӏакхийтта. Цу наькъ тӏагӏолла газа турбаш дӏахьош баьхкача болхлоша, шоай гӏулакх чакхдаьлча, ор дӏадикъадац. Тахан бӏарчча лаьттан гувнаш латташ, моллагӏа саг чувожа йиш йолаш моттиг я из», - дийцар «Сердалога» Къаман фронто.
Хӏара денна цхьацца шоай гӏулакхаш кхоачашде арабувла безаш бола нах ба из урам дӏалаьца бахараш. Из деррига хьагойташ йола видео а ӏотӏайиллай бахархоша шоай лоткъам тӏа. Къаман фронте сиха оарцагӏбаьлар, из хьал меттадоаладе аьнна.
Магӏалбика кхален администрацеца бувзаме баьнна, из урам эггара хьалхарча оагӏонца тоабе безача моттигашта юкъехьо, аьлар цар. Берригача урама хьал боаггӏача боараме, кӏоагаш дӏадикъа, никъ билла хилийта аьнна дехар чуделар администраце.
Тенкенаькъан цӏерах болча урамерча бахархоша чӏоагӏа сатувс из моттиг ма хулла сихагӏа меттайоалаяь хиларга; цӏенача, лертӏача хьале болча новкъа гӏолла дӏабаха аьттув болаш хиларга.
