Магӏалбика цхьацца долча вӏаштӏара даьча цӏеношка газ хургьяц
Магӏалбика цхьацца долча вӏаштӏара даьча цӏеношка газ хургьяц, из соцаяьй газа болхлоша, цига кхоачамбоацараш гучадаларах, из бахархошта кхераме хьал доландаь. Из хоам бир «Сердало» газетага Гӏалгӏайчен ЦУРе.
«Тӏахьожама болх дӏахьош, Гарданаькъан 29-ча цӏагӏа бокъо йоацаш газ чуйилла хилар гучадаьлар. Цул совгӏа, Осканаькъан 12-ча, Гарданаькъан 29А номер йолча, иштта Гогола 32-ча цӏошка бахача наха шоашкара йӏовхал лоаттаю газ чуйиллай, бокъо луш дола каьхаташ а доацаш. Кхерамзлен хьал чӏоагӏдара, кхоачамбоацараш юстардаьха даллалца, цига газ хургьяц», - аьлар тхоца къамаьл даьчо.
Газ юха чуйиллале, цу цӏеношка бахача наха эшаш дола каьхаташ ӏалашде деза, иштта говзанчашта духьале а йоацаш, газа гӏирсашка хьажа бокъо яла еза. Газ юха чуюлларгья, деррига каьхаташ кхоачам болаш хинначул тӏехьагӏа.
