Удаш гув тӏа а юха кӏалбалар а ӏомадаь спортсменаш белгалбаьлар Гӏалгӏайчен лоамашка
Гӏалгай мехка бекарга бетта 17-ча денгара 20-ча денга кхаччалца, ерригроссийски скайраннингах йола яхьаш дӏахьоргья, яхаш, дийцар «Сердало» газетага ГӏР Кулгалхочун зарбан болх лелабераша.
Йоккхий яхьаш дӏахьоргья Жӏайрахьа кхале, «Жӏайрахь - 2026» яхача фестивала чуйоагӏаш. Цига дакъа лоацаш хургва Россе тайп-тайпарча моттигашкара 140 спортсмен.
«Цар никъ хургба республикан эггара хозагӏа йолча моттигашка гӏолла: къаьнарча юрташка, гӏалай комплексашка, лоаман бовхьамаш бӏаргагуш, цу юкъе Казбек лоам а болаш. Из спортсменашта атта доаца декхар да, бакъда Гӏалгӏайче ший мел йолча хозалца бӏаргагора йола таро а я. Оаха хьакхолл лоаман спорта хьал дегӏадоаладара йола таронаш, болх беш я Шолжа кхале «Мужече» яха республикански спортивни-ӏомабалара центр, каст-каста дӏахьу тренировкаш, яхьаш. Цу дерригане таро лу ерригроссийски борамах йола яхьаш дӏаяхьа», - аьлар мехка кулгалхочо Келаматанаькъан Махьмуд-ӏаьлас.
Иштта, Махьмуд-ӏаьлас белгалдир лакхача боарам тӏа яхьаш дӏаяхьар лоархӏаме хилар, цунца цхьана, вай республике хьабаьхкача хьаьшашта шоаш раьза хилар гойтар.
Цу тайпара, лоаман моттигашка спортсменаша дӏахьош йола яхьаш массанена езалуш хургья, аьнна, хет.
