ГӏалгӀайчен къаман библиотека - из духхьал книжкаш лораду моттиг хинна Ӏац, из я дешара дуненца, культураца вӀашагӀкхетара йола моттиг. Укх ткъаь итт шера республикан керттера библиотека книжкаш дезарашта, хӀама довза гӀертарашта шоллагӀа дола цӀа хинна дӀаэттар. Керттера дакъа дӀалоац Къаман библиотекан балха даькъ тӀарча цун кулгалхочо ГӀазданаькъан Радимас. Из я Россе цӀихеза культуран болхло, цо ший деррига вахар дӀаденнад цу ший хьамсарча балха. Цун кулгалца Къаман библиотека таханарча заман культуран, Ӏилман центр хилар, хано дӀадехаш мел долчоа жоп луш йола.

Гӏазданаькъан Радима дукха ха я мехкал арахьа а цӀихеза, дика болхло санна йовзаш йола. Укх деношка цун цӀерагӀа дукха ловцаш ух Россе балха новкъосташкара. Хӏара ловца- библиотекан гӀулакх цо дегӀадоаладарца бувзабенна, культуран тӀехьале лораяра оагӏув белгалбеш ба.

Ткъаь итт шера болх бар - из дикка ха я, цу юкъа республикан берригача бахархошта багаяха, наьха баркал тӀехьа долаш къахьегаш я из. Тахан цо дӀахохьу мехка дешар, культура.

Дӏадахача ткъаь итт шера библиотеках хилар республикан бокъонца йола культуран центр; берригаш, книжкаш дезараш, дешарца хьашт дараш тӀаоз цо, иштта цига латт даим беза хьаьший.

«Вай библиотеке хул цӀихеза культуран, искусствон болхлой, юкъарлон болхлой, гӀорбаьнна йоазонхой, публицисташ, ГӏалгӀайчера меттел, ерригача Россера а,- яхаш дувц ГӀазданаькъан Р адимас. - Хӏара цу тайпара никъ, цӏаккха а бицлургбоацаш бус урхаллен исторе оагӀон тӀа, цун культуран тӀехьале кхы а лакхагӀа мах болаш яра, таронаш йоаржаяра.

ДӀаяхача ханашка библиотека дика майда хилар, дукха кхетаченаш дӀаяхьара. Тхо долча кхоллама кхетаченаш хилар, Ӏилман конференцеш, литературан сайренаш, дешара цхьанкхетараш. Хӏарадар лоархӀаме дакъа хинна дӀаотташ дар мехка культуран вахар дегӀадоаладара, наха юкъе дешар дукхагӀа доаржадара».

Тахан доаккхал дер да, вай библиотека берригача мехка гӏолла хьаийцача, кхычарна юкъе эггара къонагӀа яле а, дукха хӀама карагӀдаьнна хилар. Коллектива балха говзал лакха хиларах, даим болх кердабоаккхаш хиларах, цо Россе библиотекай юкъарлоне ший моттиг хьалаьцар.

Тахан, дӀабихьача наькъага хьежача, тхо тешшаме ала йиш йолаш да: библиотека, ший декхар кхоачашдаь а ца Ӏеш, из дӏахо а дегӀайоагӀаш я, тешшаме дешара культуран лард чӀоагӀъеш, из массанега дӀакхоачаш я, къаьстта дешара тӀакхувш барашка.

Библиотекан хургдар дувзаденна да, кердадараш юкъедарца. Тахан из я керда урхалле, массахана эргабувла болх дӀахьош йола кердадарий технологеш юкъейоахаш, керда таронаш тайп-тайпара ха яьннача наха дешара даькъ тӀа хьаеллаш.

ГӏалгӀайчен къаман библиотека дика дакъа лоацаш я, ерригроссийски культуран кхетаченашка. Цун болхлошка шортта да кхычарца декъа йиш йолаш дар. Дукха ха йоацаш, республикан керттерча библиотеко гойтар ший йоккхий таронаш.

Ардара бетта 6-10-ча деношка, Новосибирске дӀахьош яр XXVӏ-гӀа Ерригроссийски Ӏилман-болх шаьрбара кхетаче, «Библиотекай мехктохкама балха хаттараш» яха цӏи йолаш. Из йоккха библиотекай юкъарлон профессиональни кхетаче вӀашагӀъеллаяр Российски библиотекай ассоциаце, Россе къаман библиотеко, Новосибирска паччахьалкхен Ӏилман библиотеко, Новосибирска областа культуран Министерствос хьаллоацаш.

Цунна доккха дакъа юкъедихьар ГӏалгӀай Къаман библиотекан мехктохкама отдела кулгалхочо Йовлой Заремас. Цун доклад гойтар лаьрххӀача балха оагӀон тӀа, из хетаяь яр российски библиотекай даькъ тӀарча балха.

ГӀалгӀай Республикан НБ балха говзал цу лостамагӏа йоккха я, цунна чудоагӏа историко-культуран мехка тӀехьален мах бараш лорадар, доаржадар. Библиотекан лоархӏаме мехктохкама материалаш лораярал совгӏа, дешархошца тайп-тайпара балха оагӏонаш дегӏайоалаю. Йовлой Заремас тахан дӏахьош болча библиотекан балха доакъош вай республикал арахьа а довзаш да, шоай дикалца, пайда боалаш хиларца. Россе кхыча моттигашкарча библиотекай балха а юкъейоалаю цун балха говзал. Гӏалгӏай Республикан Къаман библиотекан дика балха говзал хиларо дӏагойт, библиотека ӏадатех бола болх мишта дӏабахьа беза, таханара технологеш юкъейоахаш, цунца цхьана библиотека балха даькъ тӏа хувцамаш деш хилара балха оагӏонаш.

Ерригроссийски ХХVӏ ӏилман-болх шаьрбара кхетачен доакъашхоша «Библиотекан мехктохкама балха хаттараш» дувцача дакъа лоацаш кхетадир, Гӏалгӏайчен керттера библиотека, из духхьала культуран мах бараш лорадара йола урхалле хинна ца ӏелга, из я мехктохкама болх дегӏабара дика къахьегаш йола центр.

Тахан Гӏалгӏай Республикан НБ хӏара болхло шийгара цхьацца дакъа юкъедахьаш ва, книжка тӏара хьаэцача дешарах наьха кхолламаш, къамаьла хьалаш дегӏадоаладе гӏерташ.

Библиотекан болхлой профессионализм белгалйоалаш хул, цар нахаца дӏахьош болча балха, уж даим никъ лохаш ба кердадараш юкъедаха, нахаца къамаьл хотта таронаш лохаш, тайп-тайпара кхетаченаш дӏахьош, хӏара балха ди ший тайпара наха пайда луш хилийта хьожаш.

Библиотекан культуран- дешара оагӏоно дӏахьу боккха лостам бола болх. Укхаза дӏакхухь ӏилман конференцеш, литературан сайренаш, авторашцара кхетаченаш, викторинаш, хьаькъале ловзараш, гойтамаш, кхоллама говзанчий хьехамаш.

Къаьстта йола моттиг дӏалоац библиотекан балха даькъ тӏа гойтамаша. Экспозицеш даим кердаювлаш я, книжкаш гойташ, бокъонца йола проекташ юкъейоахаш, цу юкъе интерактивни балха оагӏонаш, мультемедийни кердадараш довзийтар, тематически гойтамаш хул.

Гӏалгӏайчен Къаман библиотекан болхлой, дукхача хана денз болх беш а, балха говзал лакха йолаш а шоай моттиге хиларах, вай бахархой таро я укхаза хьабаьхкачул тӏехьагӏа шоай дего тӏаэцаш дола хӏама харжа, цул совгӏа къамаьл а хургда нахаца.

Къаман юкъарча «Сердало» газетаца НБ бувзам бола дукха ха я, укх дукхача шерашка тхоайла цхьана болх беш да ала йиш йолаш, вай юкъарлон массайолча оагӏорахьара интеллектуальни вахара оагӏонаш дегӏайоалаеш. Тахан оаха даькъалабувц тхоай тешшаме доттагӏий. Тха доттагӏал даим хиннад кердадараш цхьана лохаш, тхоайла вӏаший бувзам болаш. Хӏара денна дегӏабоагӏаш хилба шун дешара тӏакхувш бола нах, керда кхолламаш хилда шун балха даькъ тӏа!