Дикача наха юкъе
«БлогеRӏ» яхача оагӏоно бахархошта гӏо ду тахан
Бера хана денз, дикача нахагара масал эца ловш хул саг… Тайп-тайпарча хьона гонахьарча наха доаржадеш долча дикача гӏулакхаша дунен хӏама сийрдагӏа, хозагӏа хулийт. Хӏаьта Рамадан бетта къаьстта чӏоагӏа лов бусалба наха шоашта могаш дола дикаш кхыбарашца декъа, вӏаший дог хьаста. Тахан Даьла духьа цхьацца гӏулакхаш леладерашта дика йовз наьха сагото, цар бала, цар хьал.
Вай мехкарча гӏо деш йолча ганзаша, ди-бийса ца къовсаш, болх лоаттабу торо йоацараш, цамогаш бараш, цхьацца бала тӏакхаьча хала хьувзараш лохаш, царна цхьацца новкъостал деш. Тахан вайна юкъе кӏезига бац Даьла духьа дог ийшачун, халача хьале эттачун оагӏув хьаллаца, дог хьаста ловраш. Из чӏоагӏа гӏадвугаш да! «БлогеRӏ» яхача къонача блогерски оагӏон юкъе а ба Даьла духьа дикаш доаржаде ловраш. Вай мехкара 60 кхалсаг я къахетам, пайда боаржабара, дикал кхоллара тӏехьа къахьега вӏашагӏкхийттараш. Халача хьале эттарий оагӏув хьаллацар, могача низаца царга хьажар, массахана лоархӏамеча гӏулакхех хиннад», - белгалдир из оагӏув хьакхеллача Йовлой Лизас.
Магасе дӏахьош хиннача кхетаче гулделар халача хьале болча дезалашкара бераш, иштта дегӏа могашал эшаеннараш. Аниматораш болабаь, тайп-тайпара ловзараш, викторинаш йолаш дӏайодаш яр из кхетаче. Цхьан доазон тӏа гулбеннабар вӏаший къахетаме хила, дикаш доаржаде ловш бола нах. Хӏаьта Рамадан бутт хьаэттача; беррига бусалба нах цхьа ший тайпара дог айделе; хозача, дог гӏоздоаккхача хӏаманга сатувсаш хул. Къаьстта сатувс могаш боацараша, халача хьале эттараша. Рамадан дикача гӏулакхий бутт ба, цунга хьежжа дикаш доаржаде сиха хила веза аьнна хет хӏаравар! Дарбанче санитарка болх бе безача эттар Деби-Юртара Балкхой Золотхан. 28 шу да цу даькъ тӏарча дарбанче из болх цо лелабу.
14 шу даьлча халача лазарах цамогаш хилар цун йиӏиг. «Эпелептически шизофреноподобный-психоз» яха лазар оттадир цунна лораша. Иштта могаш еце а, маьре яхар йиӏиг; бакъда, бер даьчул тӏехьагӏа, юха цӏаера. Тахан Золотхан 45 шу даьннача ший йоӏага, цун 10 шу даьннача йиӏигага хьежа езаш я. Доккха дукъ да цу кхалсага тӏалаттар тахан. Дукха бераш дола цар дезал, Казахстанера цӏабаьхкачул тӏехьагӏа, 1960-ча шера хьалдаьча тишача, къаьнарча цӏагӏа бах. Кхоачашде дезаш хьалхашка латтараш геттара дукха да…Чӏоагӏа сатувс цар массане кердача, лертӏача хьале долча цӏагӏа баха.
«БлогеRӏ» хиннача кхетаче Золатхана ӏумрат де яха ши путевка елар. Даьла къахетам, биста варгвоацаш, боккха ба; хӏаьта гонахьа къахетаме, хьох дог лаза нах хилча иштта хала хетац шийгара хьал. Тахан, 71 шу даьннача дийнахьа, укх дунен тӏа эггара езагӏа йолча моттиге яха дуӏаш де, Далла хьоастаяла, Цунна хоастам бе аьттув ба цу кхалсага. Ишттача гӏулакхаша хьагойт вайна, бусалба нах массахана вӏаший дог лазаш, къахетаме, Даьла духьа дикаш доаржаде ловш хилар мел хам, мах баь варгвоацаш доккха да!
