Ма дарра аьлча, Кавказе мел даха адам цу гӏулакхага хьожаш, тахан вай дерригача къаманга кхаьча гӏайгӏа, бала бекъаш да. Берригача нахага чӏоагӏа тамаш яйташ денал да бархӏ шерга мара кхачанза волча цу кӏаьнка гойтар.

Дийца ца валлал доккха халахетар да из эггара хьалха ший даьна-нанна, тӏаккха вайна массанена. Дукха догӏаш латтарах хий дикка айденнад, цул совгӏа, ӏочухьежача цхьаккха хӏама бӏаргагуц – ӏаьржденна доагӏа хий. Эксковаторашца, бульдозерашца хий кхычахьа дӏачудерзадеш ӏолохде гӏерташ къахьегаш ба укх деношка, хи чу леларий дикка хьажа аьттув хургболаш. Цхьан минота ца соцаш, дӏахьош ба болх, кӏаьнк вайнача дийнахьа денз, Мехкадас тахан ше тӏахьожам лоаттабу цу гӏулакха. Республикан кулгалхочо Келаматанаькъан Махьмуд-ӏаьлас теркалдарах тарра, гӏулакх чӏоагӏа хала латт. Хий хьийдда дарал совгӏа, дикка айденна доагӏа, чӏоагӏа фийла хила везаш да этта хьал.

«Вай берригача мехкага йоккха хало я тахан, хӏара цӏагӏа кхаьча бала ба из. Дика кхетаду аз цу кӏаьнка даь, наьна хьал, цар дегашка латта гӏайгӏа. Де йиш мел йола хӏама хьадеш да вай тахан. Вайна уллув дӏаэтта, кӏаьнк лохаш ба нохчашкахьара, селашкахьара, черсашкахьара, хӏирашкахьара нах. Берригаш цаӏаш хинна дӏаэттаб тахан. Доккха баркал кхайкаду аз из кӏаьнк лаха арабаьнна мел леларашта»,- аьлар вай Мехкадас.