Лоалахарча мехка бахача, вайца вошал леладеча нахага хало кхачар вай дегашта бохам беш хӏама да. Доккха хатар да тахан цу мехка эттар. Дӏабахача бетта 31-ча дийнахьа денз, халача хьале эттарашта гӏо де хӏамаш йохьийташ болх дӏаболабаьб мехка.

Къахетамах дизза дог долча нахага хӏама кхоачаргдац, оалаш да вайна юкъе. Вӏалла а дагадоацача хана иштта доккха хатар оттар дог дохош, ла хала долаш хӏама да. Дукха адам да цӏенах, шоаш мел ӏоадаьча хӏамах даьнна, эрий ара дисар… Селий мехкарча массехк кхале хий айденнача хана, уйла ца еш цига оарцагӏбаха кийчо йир МЧС колледжа хьехархоша  Галай Асхьаба, Батайнаькъан Рашида, иштта студенташа Мерешканаькъан Алима, Йовлой Ислама.

Кӏира совгӏа ха я МЧС болхлошта хий машинашца дӏачуозаш дӏакхахьа, йиса хӏамаш кӏалхаръяха, кхерам боацача моттиге нах дӏакхувла  новкъостал деш уж лела. Тоабан кулгал деча Галай Асхьаба белгалдечох, болх дӏакхахьа эггара халагӏа да  хий вӏалла дӏадаханза латтача кхалешка. Хӏара цӏа, моттиг цу доккхача хатарах кӏалхаръяккхалца цӏабахка лаьрхӏа бац вай мехкара Даьла духьа гӏо деш бараш.

Бокъонца бола турпалаш шоай цӏи дӏахазийта гӏерташ хилац, цхьаккха халонах ца кхераш, шоай гӏулакх кхоачашдеш хул уж; ди-бийса ца къовсаш. Цхьаннена а хац из чоалхане болх маца йистебаргба, бакъда вай мехкахой цхьа бахьан из гӏулакх меттаотталца къахьегаргдолаш ба цига.

Мах баь, хам баь варгвоацаш да кӏалбисарашта гӏо де оттар, хьайна могачох дог дехача наьха оагӏув хьаллацар. Ма дарра дувца велча, дог дохадеш хало я цу нахага кхаьчар. Дуккхача шерашка къахьегаш, шоаш тоадаь боахамаш, ковнаш хиво ӏокхухьаш, белхаш тӏехьахьежаш латт нах. Эттача хатарах унзардаьнна миска хьайбаш корзагӏдаьнна, кхераденна кхест. Хин юкъера уж арадоахаш, лел дог деха адам.

Царна уллув латтаргба вай мехкахой, цар гӏайгӏа шоай лоархӏаш, царгарча хьалах дог лазаш. Селий къам массахана вай къаман гарга, хьамсара хиннад, вайца вошал дола нах ба уж, цудухьа тахан царна санна хала долаш тӏаийцад из хатар вай а.