Турпалаш дагабоагӏаш
СВО доакъашхочун цӏенга хьожаш ба, «Даьхен лорабой» яхача ганза доакъашхой
«Даьхен лорабой» яхача ганза хьалхашка латтача керттерча декхарех да СВО доакъашхой могашала терко еш, царна лерттӏа дарба лоаттадеш, эшача хӏаман тӏехьа оагӏув хьаллоацаш хилар. Укх тӏехьарча шин шера болх беш я вай мехка СВО заӏапхошта лаьрхӏа йола «Хьаькъале цӏа» яха проект. Тӏема операце доакъашхо волча Цхьорой Ахьмада цӏен хьал аттачахьа даргда, дукха ца говш.
2022-ча шера ший лоӏамца Укриане вахар из. Массехк бутт баьлча, ийккхача минах човнаш хилар цун дегӏа, аьрда кулг тахан а дикка болх беш дац цун. Из вахача цӏенга хьежа, малагӏа хувцамаш де деза белгалдаьд цу оагӏонцарча болхлоша.
Ганза болхло йолча Беканаькъан Мадинас болхлошца цун цӏен бустамаш даьхад, вахара хьал цун аттачахьа доаккхаш хургдола хӏамаш оттаде лаьрхӏад цӏагӏа. Заӏапхочун цӏагӏа паргӏатагӏа хургйолаш де йиш мел йола хӏама кхоачашдергда.
«Иштта дола гӏулакх заӏапхошца леладар чӏоагӏа лоархӏаме да. Шоаш дагабоагӏилга, хам белга, лоархӏилга гуш хила беза уж нах, царна хала дар аттачахьа доаккхаш къахьега деза вай», - белгалдир ганза мехкарча филиала кулгал деча Оздой Муслима.
Даьхен гӏулакха араваьнна, тӏема декхараш къоачашде ураэттача сага хьал тоаде, цун оагӏув хьаллаца беза тахан.
СВО доакъашхошца массахана бувзаме болаш, цар вахара хьал миштад тохкаш хьабоагӏа «Даьхен лорабой» яхача ганза болхлой.
