Цхьанне бала массанега кхоачаш хул
Лозабаьча СВО доакъашхошта, гӏо лоаттаду «Даьхен лорбой» яхача ганза болхлоша
«Даьхен лорбой» яхача Паччахьалкхен ганза балха юкъе тӏема моттигашкара ветеранаш кхы а шин оагӏонца бекъаш дола гӏулакх чӏоагӏдеш долча амара кулг яздир РФ Президента Путин Владимира. Хьалхарбараш – тӏема операце моттигашка геттара лозабаь боллашехь, РФ тӏема низа оагӏонцара декхараш кхоачашде ӏийнараш. Шоллагӏбараш – РФ тӏема операци латтача моттигашка чугӏертарашта духьале еш лозабаь, заӏапхой хиннараш. Хьалхагӏа цох лаьца дийцадар «Даьхен лорабой» яхача Паччахьалкхен ганза кулгалдеча Цивилева Аннас. Цу амаро тӏема операце моттигашка заӏапхой хиннача бӏухошта ганзага шоашта эшача хӏаман хоам бе бокъо лу.
«Заӏапхой болаш, шоай декхараш кхоачашдеш бола бӏухой, иштта чӏоагӏа лозабаь шоаш боллашехь, РФ nӏема низа оагӏонца дӏахо гӏулакх дӏадахьа ӏеш бола уж бокъонца бола турпалаш ба! Массахана царна фу эш хьожаш, цар хьашташ кхоачашдеш хила деза вай. Доккха баркал кхайкаду аз вай Паччахьалкхен Кулгалхочунна тӏема операце доакъашхошта, цар дезалашта иштта терко еш хиларах»,- аьлар Цивилева Аннас.
Оттадаьча каьхатага диллача, лозабаь боллашехь тӏема декхараш кхоачашде лаьрхӏа ӏийнача бӏухошта вахара хьал аттача даккха, дегӏа могашал меттаоттае хӏама доагӏа. Цу юкъе я спортивни протезаш, «адаптивни» оала барзкъаш, атта дӏалалла йиш йола машинаш, иштта цӏагӏа гӏолла дӏа-хьа лела аттагӏа хургдола хӏамаш. Цул совгӏа, спортивни, физкультурни кхетаченашта, «Даьхен лорfбой Кубка» яхьашта юкъекхувларгба ганзо уж бӏухой.
«Тӏема операце доакъашхой хьал аттача даккхар, тахан царна къувлаш дола кхоачамбоацараш юстардахар паччахьалкхен хьалхашка латтача керттерча декхарех да. Тха балха юкъе СВО кхы а шин оагӏонцара ветеранаш чӏоагӏбеш соцам баь хилар, царна массахана терко е ловш хилар да. Ганзо ший болх бехктокхаме дӏабахьар чӏоагӏа лоархӏаме долга белгалду цу гӏулакхо. Мел йоккха хало кхачарах Даьхен гӏулакхе латта ловш болча бӏухой сий дар, хам бар вайх хӏаране декхар да? аьлча харцахьа хургдац. Тхо кийча да царна эшар ӏалашде, эггара хьалхарча оагӏонца дикагӏа йола протезаш оттаяйта, шоай цӏагӏара гӏулакхаш царна аттача даха»,- дийцар тхога «Даьхен лорбой» яхача Паччахьалкхен ганза вай мехкарча филиала хьалха латтача Оздой Муслима. Цу оагӏонцарча болхлоша белгалдечох, ишттача хьале болча ветеранашта лоаттаде дезача гӏулакхашта къоастам бар турпалхой хьал ма хулла тоаде хьажар да. Шоай могашал эшаенна йоллашехь, дог ца эккхаш дӏахо а Даьхен хӏама лораде ловш болча бӏухошта доккха баркал кхайкаду тахан! Теркал ца деш дита йиш ярех дац из хӏама. Цхьаккха шеко йоацаш, деналах, майралах бизза бола, яхь йола къаман къонгаш ба уж. Гӏулакхаш геттара телхад, аьнна, хетача хана; сийленца духьалъоттар массанеца долаш хӏама дац. Могаш, маьрша болаш; бахалба вай бӏухой дуккхача шерашка!
