2023-ча шера тов бетта къаман гвардена юкъе дӏаязвир из. Болх бе дӏаволавеннача хьалхарча дийнахьа денз, ший декхараш бехктокхаме кхоачашдеш, дика оамал йолаш, гонахьарча новкъосташта тешаме новкъост волаш, хьавоагӏаш вар Хьасан. Шийна тӏадилла моллагӏа гӏулакх боаггӏача боараме дӏачакхдаккха ховш, наьха тешал тӏехьа долаш саг вар из. Тӏема операци латтача моттиге вахар тӏеххьара хилар цун. 

Цига дӏакхаьча массехк бутт баьлча, дӏаваьлар из. Гӏалгӏай мехка цӏен-нана, цунга сатувсаш хинна пхи бер дисад. Ла ма могга дола халахетар да из боча, хьамсара воӏ, да, цӏен-да воацаш бисача наха… Вахара ха-м дӏахойодаш я, мел хала дале а шийна Дала енна ха йоаккхаш, Далла хоастам беш ваха везаш да дунен хӏама. Хӏара дезале нийслу цхьацца халонаш… Иштта хьалха вахар хаьдача воӏа тӏехьа саготдаь дегӏа могашал эшаеннай даь, наьна.

Ганза болхлошка республикал арахьа могашал меттаоттае баха гӏо де шоашта, аьнна, дехар дир цар. Тиймарзанаькъан Луиза эттар цар гӏулакхага хьажа, каьхаташ вӏаштӏехьдоахаш гӏо де. Укхаза лоархӏаме дар, хоржаш йолча санаторе ха дӏаяхьарах, дегӏаца гучадоалаш долча цхьацца лазарашта дарба деш хилар. Гӏирмерча Алушта яхача шахьара «Сийрда-сийна талгӏи» яхача санаторе ха йоаккхаш да тахан бӏухочун да, нана.

«Тӏема аренашка вахар хаьдача бӏухой цӏагӏарча наха уллув хилар, цар хьашташ кхоачашде массахана кийча хилар тха балхаца эггара лоархӏамегӏа дола гӏулакх да ала деза. Вахаре, юридически оагӏонца нийслуш дола кхоачамбоацараш юстардахара тӏехьа новкъостал дарал совгӏа, дегӏа могашал меттаоттае, боаггӏача боараме дарба чакхдаккха царна гӏо де дезаш да тхо тахан.

Турпалий даьшка, ноаношка хьажар, царна терко лоаттаяр, могачох цар дог хьоасташ хилар тхона лоархӏаме да. Яьнна ха, цар дегӏа хьал теркалдеш; харжа хьож тхо дарба дӏахьоргдола моттиг. Массахана царна хьалха а доах оаха; новкъостал эшаш хилча, тхога хоам беш хила, яхаш. Белгалде деза, цу мугӏарера болх вай Мехкадас ше тӏахьожам лоаттабеш дӏахьош болга тахан», - дийцар, тхона интервью луш, Тиймарзанаькъан Луизас.