Шахьаре № 2 йола ишкол яьккхар Адама. Массанена юкъе белгала волаш, ше везийта ховш, оамалца эздий саг вар кхувш латтача хана а. Хьехархошта цIаккха а бицлуц иштта хинна дешархой. Адам массане боча, хьамсара вар, ший беркате оамал бахьан долаш.

Рязанерча гвардейски лакхерча фецарча, эскара инарал хиннача Маргелов  В.Ф. цIи лелаеш йолча  тIема училище деша эттар из. Шийна хьалхашка декхар оттадаь, лаьрхIар кхоачашде гIерташ тIатеIIа къахьегаш вар вай мехкахо. Йоккха юкъ ялале, Ульяновскерча десантно-штурмовой рота кулгалде оттавир из.

ТIема операци йолаеннача дийнахьа денз, Укрианерча аренашка ший тIема декхар токхаш вар зIамига саг.

2022-ча шера маьтсела бетта 19-ча дийнахьа тIема юкъе лозавир из, хьожадаь техача герзо. 21-ча дийнахьа, ши ди лозаваь даьккхача, хаьдар цун вахара никъ, човнаш сов хала хиларах.

Массане дегашка деналах, эзделах визза саг волаш ваха висар Адам.Российски Федераце Турпал яха цIи елар цунна 2022-ча шера аьтинга бетта 27-ча дийнахьа.

«Даьхен гIулакха латташ вахар хаьдар цу деналах, майралах визза хиннача къаман дикача виIий», - белгалдир ший къамаьла юкъе вай мехкадас Келаматанаькъан Махьмуд-Iаьлас.

Дика саг массахана ваха вус дегашка, шийна тIема сийрда лар ют цо. Иштта болча эздийча къонгий цIераш йовзийташ,  кхее еза вай тахан къона тIехье! Турпала вахара наькъах дувца дукха да тахан!