«РФ Президентагара боккха лерхӀам ба Невский Александра орден ялар»,- белгалдир мехка Кулгалхочо, таханара толам, бӀарччача тоабо мехка хьал тоадеш, пхе шера дӀабихьа боккха болх болга теркалдеш.

Даьхен гӀулакха хьинаре къахьегарах, доккхий толамаш дахарах, луш я таханара орден. Республикера хьал тоадеш, болх дӀабахьарал совгӀа, ерригача Россе гӀулакха латтара белгало я из. Цу юкъе да тайп-тайпара оагӀонаш: экономика, Ӏилма, дешар, культура, иштта кхыдараш.

Белгалде деза, Келаматанаькъан Махьмуд-Ӏаьлас кулгал деча юкъа мехка дукха лоархӀаме хувцамаш хиннилга. Хьалъяьй керда берий бешамаш, дарбанчеш, ишколаш, тишъеннараш тоаеш къахьийгад. Иштта дикка меттаденад юртбоахама оагӀон хьал. 2024-ча шерара беркат 7,7 млн долларга кхоачаш да. ДӀадаха шу теркалде эттача, укх шерара хьал 1 млн кхоачаш айденнад.

Хоалуш тоаденнад мехкара кхыдола оагӀонаш. Йоалаца дувзаденна, иштта кхыйолча моттигашкара республикерча ганзе укх шера хьачудена рузкъа 70,8%-га кхоачаш да. Промышленни хьал теркалде эттача, 2023-ча шера СКФО мехкашта юкъе эггара хьалхарча моттиге латт вай. 17,1% тӀа латт из гӀулакх. Цу оагӀонца лоархӀаме гӀа баккхар да «РИАЛ» яха кӀалах хӀамаш хьаю завод хьаеллар.

Доккха дакъа цу балха юкъе дӀалоацаш я ООО «4БРА» яха хӀамаш тега фабрика, москала дулха даараш арахеца моттиг. Келаматанаькъан Махьмуд-Ӏаьлас белгалдир, республикан хьал тоадара тӀехьа федеральни оагӀоно дикка гӀо лоаттаделга: «Доккха баркал оал аз вай мехка хам баь варгвоаца новкъостал лоаттадеш волча Путин Владимира. Доккха гӀо да таханарча дийнахьа цо вай мехка дер».