«Гатагӏажанаькъан Илез тахан аз сай гӏонча оттавар цхьа цӏаьхха дагадеха хӏама дац… Илез дуккхача шерашка денз республикан культуран оагӏонцарча вахаре хьинаре къахьегаш, тайп-тайпарча моттиге дӏакхухьача кхетаченашка лоархӏаме дакъа лоацаш хьавенав. Низах визза волча цунца вай болх дикагӏа тоалургба аьнна хет»,- аьлар филармонена кулгал деча ӏаьленаькъан ӏайнас. Тахан, лоархӏаме моттиг хьалацалехь, цу чу болх беш хьавоагӏача Илеза массанена бӏаргадайтад ше бехктокхаме, тӏадилла декхар боаггӏача боараме чакхдаккха ховш болхло волга. Тоабанца болх дӏабахьа ховш, нахаца товш, ше везийташ саг ва Илез. Лоархӏаме, доккхий декхараш да тахан цунна хьалхашка латтараш. Дукха керда проекташ йоаржае лаьрхӏа ва хьинарах визза вола, болх бе чам бола къона болхло.

Гӏаьбартой-Балкхарой мехкарча университете «арт-дизайнер» яхача оагӏонца дийша ва из. Культуран оагӏонцара болх дика вӏаштӏехьабоалаш, тайп-тайпара кердадараш юкъелоацаш, къахьега ховш саг ва из. Телевидене журналист волаш, йоккхача телепроектий продюсер волаш, тайп-тайпара программаш йоаржаеш къахьегаш хьавоагӏа из. Цо къахьийгача проектех я «Сув», «Яьга сискал», «Марха дастар», «Гӏалгӏай дезале» яха лоархӏаме программаш. Къаьстта цу программашка гӏолла республике дикка дӏаяйзар Гетагӏажанаькъан Илеза цӏи. Иштта цо къахьийгар «Пандара оаз» яха къаман пандара Къилбаседа Кавказера фестиваль йоаржаеш. 2022-ча шера денз «Культуран оагӏув. Уйлаш гӏовттар» яхача юкъарлен моттига хьалха латташ ва Илез. Цо кулгал деш йоккхий проекташ, фестивалаш, боламаш дӏакхухьаш, кхувш латтача тӏехьен оагӏув хьаллоацаш болх ба боаржабаь. Паччахьалкхен филармоне болхлоша, раьза болаш, тӏаийцар хьинарца, боккхача безамца къахьега лаьрхӏа керда болхло. Теша лов, культураца дувзаденнараш дика довзаш волча Илеза цу чура болх таханарча хано дӏадеххача тайпара тоабергхиларах.