25 сага вахар хаьдар цу дийнахьа, 136 саг тайп-тайпара човнаш еш лозавир. ӏаьдала болхлой санна, юхе лаьттача цӏеношкара маьрша нах, бераш а дар цу юкъе.

Маьцхали беттацара из  къахьегама ӏуйре массахана санна дӏайолалуш яр. Ийс сахьат даьннача хана, РОВД коа шоай хӏара ӏуйранара болх дӏахьош гулбенна латтар болхлой. Цу хана чуяьлар коа эккхийта кийчъяь йола «Газель» яха машин, чувагӏаш вала лаьрхӏа бӏеха зуламхо волаш.

Милиционераша  даггара герз доладир цунна духьала, бакъда машин ца эккхийта вӏаштӏехьадаьланзар цар. 200-гара 400 кийлага кхоачаш, тротилови боарам хилар цун эккхар. ОВД гӏишло йохаеш, итташ машинаш йоагаеш, юхе лаьттача дукхача гӏатех долча цӏен доккха зе деш, хатар хилар цох цу дийнахьа.

Бӏеха нигат долча моастагӏаша нах кхерабе, мехкара гӏулакхаш кегаде, хӏара денна республика лораеш латтараш бохабе, аьнна, даь хӏама дар из. Кхаь дийнахьа таьзет кхайкадир вай мехка цу хана. Бакъда цхьаккха гӏулакхаша, дешаша дог тедацар къонгаш бейнарий. Цӏен-дай боацаш бисар дукха кхалнах, дай боацаш дисар бераш, къонгаш боацаш - дай, ноаной.

Дийца варгвоацаш, доккха халахетар дар из дерригача къаманна! Дукха шераш даьнначул тӏехьагӏа тахан а ерзанза, хӏетта хилча санна йола чов я из. Бекхам боацаш хӏама дац! Наьсарерча ГОВД из унзара хатар тӏаденараш, цу бӏехача тоабан хьалха лаьттараш, хьалеха, боабир ӏаьдала болхлоша.

Дуне, шоай къематди дехка зуламхой бар уж! Бӏеха моастагӏий лохаш дӏабихьача тохкамо, царна духьала хиннача «операце» хьагойтар, терроризм яха никъ кхоане йоацаш  болга, наха юкъе зуламаш доаржадеш лийннараш цкъа кхело лувцаргболга, из гӏулакх хьаллаьцарий  цхьаккха дикага дог доахилга йоацилга. Къилбаседа Кавказера машар бохабе, адам кегаде гӏийртача моастагӏашта шоаша лийхар корадир – бӏехача наькъ тӏа бовр хилар цар массане!

Республике мел бахача наха ӏоткъам беш, дегашка дира чов юташ, хӏама хилар цох. Мехка хӏама лорадеш, моастагӏий наькъаш тедаш, шоай декхараш кхоачашдеш латташ, вахар хаьдар къаман деналах бизза хиннача дукхача къонгий. Мел ха   дӏаяхарах, цар цӏераш вай дегашка латтаргья, къаман истореца баха биса нах ба уж!

Тахан уж берригаш дагалоацаш ди да вай… Бӏаргаш леш цу хана, 17 шу хьалха санна, хала да дувцилга доацаш; майра  къонгаш, эздий моарой, дика даьй боацаш бисарий дегаш теде дешаш корадагӏац…

Берригача мехкахоша, республиканна хьалхалаттараша, тахан болх беш болча ӏаьдала болхлоша, ветеранаша, гӏайгӏано вӏашкабихьа, корта ӏочуболла ди да из. Мехкарча Россе МВД дӏаязъяь латт цу дийнахьа бейнача милиционерий цӏераш. Тӏехьа тӏайоагӏача тӏехьен йовза, цар сий де деза цӏераш я уж!

17 шу хьалха бӏеха уйлаш, нигат  кер чу делла араваьннача моастагӏчунна хетар хиланзар вай мехка. Къаман хӏама шоашта ма могга толхаде, кегаде хьежабар кхоане йоаца  зуламхой, бакъда шоаш йоаржаяь харцо шоаех яхар царех. Нах чӏоагӏагӏа вӏашкаэзар цу хатаро!

Тахан мехкарча шахьарашка, юрташка деналца, майралца терроризма никъ хоадабеш лаьттарий цӏераш дагалоацаш ба.

17 шу хьалха къонгаш бейна бисарий оагӏув хьаллоацаш; из гӏайгӏа, бала царца бекъаш да вай. Маьцхали бетта 17-гӏа ди «ӏаьржа ди» хинна дӏаэттад вай мехка… Ерзаргйоаца чов латт наьха дегашка, къонгаш боацаш бисарий гӏайгӏа цӏаккха а яйлургьяц.