«Вай республикера, цу дикача кхетачене дакъа лоацаш хилар «Сердало» оалача кепайоазон цӀен шеф-редактор Курскенаькъан ИбрахӀим, иштта гӀалгӀай публицист, журналист, йоазонхо Мерашканаькъан Султан», - йоах хоамо.

Ярмарка цу миноте дикача книжкаех хьалйизар, царна юкъе дар дувцараш, тохкамаш, авторски проекташ, дийна дола литературан дош.

ГӀалгӀайчера, кхыча Къилбаседа Кавказа мехкашкара денача книжкаша дешаш барашта гойт къамий культураш, къаьнара, таханара истори, Ӏадаташ, турпалхой, цӀихезача болхлой вахара никъ.

Тахан, вай сихача, дукхача кхолламий наькъаш долаш дахача хана, книжка дешаро сага дикагӀа йола оамалаш кхею. Книжко таро лу моллагӀа йолча ханага кхача, наьха турпалал, денал го, гонахьара дуне довза.

«Со тешаш ва, цу тайпарча книжкаш дешарий, начӀал долча йоазонхой, Россе бахархой дикача вӀашагӀкхетаро дика таро лу массайолча оагӀорахьа наьха сакхетам дегӀабоалабе», - аьлар Курскенаькъан ИбрахӀима, цига шийна хьалхарча сахьаташка дайнар дувцаш.

Ярмарка дӀайихьар кхаь дийнахьа; исбахьален литература, Ӏилма, культура, спорт, психологи, тайп-тайпара балхаш, кхоллама никъ безараш гӀад а бугаш.