Йоккхача яхьашка дакъа лоацаш хьабоагӏарех ба уж. Дуккхаза белгалбаьб уж цар балха лакха мах оттабеш. «Лоаман оаз» яхача ансамбла цига довзийтаргда вай къаман мукъамашцара гӏирсаш. Гӏалгӏай къаман культура массайолча моттигашка, йоккхача арахьарча яхьашка дикка дӏайвзийташ, лакха толамаш доахаш хьайоагӏа из тоаба. Къаман тхьоврача хана денз дола мукъамаш тахан цу фестивале дӏадовзийтаргда цо. «Сердало» газета интервью луш Республикерча къаман кхоллама Цӏен исбахьален оагӏонцара кулгалхо йолча Абдурзаканаькъан Аьсета белгалдир, из йоккха проект Россе даха къамаш цхьанкхетара Шера хетаяь йолга.

Кхетаче гуллургба Къилбаседа Кавказера, Къулбихьерча Россе моттигашкара говзанчаш. Къаьнара аьдагӏий чӏондарг, эрмалой тхьоврара дхола, эллиной фата, иштта кхыдолча къамий гӏирсаш довзаргда цига. Ставрополе дӏахьош йола ерригача Россе мехкий фестиваль лоархӏаме я, Россе культуран оагӏонга диллача. Дукха хӏама да фестивале чулаьцар. Хӏаранена боча я шоай къаман культура, истори.

Программан юкъе эггара лоархӏамегӏа да аьнна белгалдаьд кхоллама лаборатореца дувзаденнараш. Артистий, тоабан кулгалхой аьттув ба къаман культуран сийг тӏехьа тӏа боагӏарашка дӏакхачийта, царна дукха хӏама довзийта. Паччахьалкхен культуран оагӏонцара политика тахан йоаржаеш, цун хӏама тоадеш латт хӏара миӏинге.

Модератор, керттера тохкама болхло я цига Поленов Д.В. цӏерах долча Россе Паччахьалкхен Цӏен регионашта юкъерча бувзамах йола говзанч Занина Елена. Цо кулгал деш тайп-тайпара хаттараш доашхаш, культуран оагӏонцара болх таханарча вахаре мишта хьаллаца, боаржабе беза ховргда доакъашхошта. Иштта шоаша лаьрхӏача гӏулакхех, кхоллама оагӏонца дувзаденнарех дувцаргда гулбеннараша.

Цу фестивалах къаман дагалоаттама институт ала йиш я тахан. Истори, культуран никъ, тхьоврача хана денз хӏара моттиге лорадераш довзаргда цу лоархӏамеча, йоккхача кхетаче. Ставрополерча паччахьалкхен филармоне хьокхаргда дукхача наха дакъа лоацаш дола доккха концерт. Тайп-тайпарча регионашкара кӏоарга начӏал дараш хургба шоай оаз йовзийташ, къамашта юкъе барт, безам, бувзам хилар таханарча вахаре эггара лоархӏамегӏа дола гӏулакх, хозагӏа йола оамал йолга массанена дӏагойташ. Хӏаьта вай къаман культурах-м дувца, доаржаде дукха да.