Тамашийна хозал
Вай къаман тӀабувхабу гӀирс беннаб мехкарча музейна
Малсаганаькъан Тухана цӀерах йолча музейна кхалнаьха барзкъаш «ГӀалгӀай йоӀ» делар Кавказе цӀихеза модельер йолча Айнаева Залинас, чокхеш тегаш йолча говзанча Хамхой Лидас. Из хоам «Сердалога» бир ИГМК Ӏилман болхло йолча Дзейтанаькъан Жаннас. Из хоза гӀулакх 2019-ча шера денз тушола бетта тӀехьарча кӀиран дийнахьа дездеш долча Къаман барзкъан денна хетадир музея болхлоша.
Маьре болхача кхалнаьха салонаш хьайийлла Айнаева Залина ший болх тӀехдика дӀахьош, хӀара нускала эшар харжа ховш хиларах, цӀихеза я вай мехка. ЧӀоагӀа хоза чокхи да цо музейна совгӀата деннар.
Модельер-дизайнер йолча Хамхой Лидас бархатах баь, дошо беса долча таьшца бега, пенах хьалъуллабу цхьацца хӀамаш чулелаеш бола тӀормиг белар музейна. Кулгакара хӀамаш хьаеш йолча Оздой Мадинас шоай дезало чӀоагӀа лоархӀаш, лорадеш леладаь даь-даь маӀача наьха чокхи делар, ГӀаьнтамаранаькъан Хьавас кхалнаха куцала лелаеча хӀамай ботт белар. Цу лоархӀамеча кхетаче дакъа лоацаш бар историкаш, студенташ, культуран болхлой.
Наьсарерча № 4 йолча ишкола дешархоша халхар гойташ, шахьара № 2 йолча ишколе дешаш йолча Йовлой Алияс «Лорса Лида» яха илли оалаш, дӀайихьар кхетаче. Къаман культура лоархӀаш, тхьовра денз вай кхалнаха леладу барзкъа дӀа ца доалийташ къахьегаш болча говзанчашта доккха баркал аьлар музея директор волча Саганаькъан Мухьмада.
