«Каьхат» яха фильм хьакхеллар ГӏалгӀай къаман (ӏNKӏ) киностуде 2020 шера, вӀашагӀъеллача къаман къонача организаце. Из хьакхеллар – ГӏалгӀай Республикан цӀихеза артист, Б. В. Щукина Театральни института, иштта Ерригроссийски С. А. Герасимова цӀерагӀа паччахьалкхен кинематографе института выпускник Ӏамарханаькъан Амур ва. Фильм арадалар хьаллаьцар Российски Федераце культуран Министерствос.

ГӏалгӀай къаман киностуде баьча хоамах, «Каьхат» яха фильм дийхад, халкъашта юкъерча йоккхача шин кинофестивале.

Фильм юкъедихьад «Дунен халкъашта юкъерча сага бокъонех йолча фестивала» керттерча даькъа; из дӀахьоргья карарча шера, оагӀой бетта 5-13-ча деношка Аммане - Иордане столице. Из тешал деш да «Каьхата» лерхӀам хилар сага бокъо ювцача тема даькъ тӀа. «Каьхат» яха фильм иштта гойтаргда «Даккерча дунен халкъашта юкъерча кинофестивале» (Бангладеш). Из кинокхетаче йоккхагӀъярех цаӏ хургья 2026 шера, цо гулбергба наджгоанцхой бетта 10-18 деношка Азе, Европан, Латински Американ, Африкан кинематографисташ.

Цу тайпарча йоккхача кинофестивалашка дакъа лаца таро хиларо гӀалгӀай фильма хьалхашка хьаелл дерригача дунен халкъашта юкъера таронаш, иштта кинематографеца бувзам лелабар. Ӏамарханаькъан Амура а цун тоабо а хьагойтар; моттигера кино боккхача боарам тӀа даккха йиш йолга.

Вай тешаш хургда дӀахойодача хана, халкъашта юкъерча кинематографе даькъ тӀа кхы а лакхарча боараме йола таронаш йоаржае низ кхоачаргхиларах, хӀара денна киноискусствонна доккха дакъа юкъе а хьош.

Россе культуран Министерствос терко лоаттаю къамий республикашка кинематографи дегӀайоалаяра халкъашта юкъарча сцена тӀа- из ГӀалгӀайчено доаккхал де йиш йолаш хиларал совгӀа, ерригача российски кинематографе лоархӀаме моттиг я; из дукха хилара а, кхоллам боккха хилара а тешал деш йола.