«Ший дезалхочун тӏехьахьажар, бер далар - из даьшта эггара халагӏа йола чов я. Хизара валарах вай юкъара доккха хатар, бала хилар. Бакъда цун цӏенача дег чура, духхьала турпалхочун деналца карагӏдаьннар эзараш болча наьха дегашка дусаргда, эггара лакхагӏа йола сага сийлен белгало санна»,- аьлар республикан Кулгалхочо тахан журналисташца ше къамаьл деш.

Кӏаьнка вахар хоададеш нийсденна хатар, беррига мохк оарцагӏбоаккхаш хилар, из бокъонца долча денала масал хинна дӏаэттар. Массехк ди хьалха, Гӏалгӏайчен Шолжа хин берда тӏа ловзаш хиннача берех, цхьа кӏаьнк, цӏаьхха, ког лайжа хи чу вахар, из хиво ӏохьош вар. Бакъда, бархӏ шу даьнна Хизар, цхьан секунда уйла ца еш, додача хи чу чукхоссавелар ший новкъост хьалваккха. Къонача турпалхочун ка яьлар из хи чура хьалваккха, бакъда сихденна доагӏача лоаман хин талгӏеша из ше ӏовихьар.

Цу зӏамигача кӏаьнка карагӏдаьннар сиха дӏа-юха хезар эзараш болча наха. Бархӏ дийнахьа из коравой хьожаш, сатувсаш хилар еррига Росси. Лахара-кӏалхарваккхара операце дакъа лоацаш беррига мохк бар - 20 эзар совгӏа саг: МЧСа кӏалхарваккхара болхлой, водолазаш; Гӏалгӏайчера, Нохчашкахьара, Селашкахьара, Къилбаседа-Хӏирий мехкара, Къарший-Черсий, Гӏаьбартой-Балкхарой, иштта кхыча республикашкара баьхка лоӏамхой. Ди-бийса ца къовсаш, геттара халача хьалашка, уж болх беш хилар Шолжа хин бердашка гӏолла додача хи чу.

Нах тешаш бар, цаӏ шоллагӏчунца хувцалуш, хӏара лаьттан метр тохкаш къахьийгар. Дега вас еш бола хоам кхаьчар аьтинга бетта 22-ча дийнахьа МЧСа кӏалхарваккхара моттигера,   итт километр мара гаьна доацаш, зӏамигача турпалхочун дакъа корадаьд, аьнна.

Келаматанаькъан Махьмуд- Ӏаьлас, цу бера карагӏдаьннар доккха хӏама да, аьлар. Цӏена дог долча, кхераш воацача Хизара карагӏдаьннар сага денала исторе оагӏон тӏа даим дусаргда, цун цӏи таханарча а дӏахо хургдолча  а ноахалашта юкъе яхаргья, цӏенача доттагӏала, турпалала белагло санна.

Гӏалгӏайчен Кулгалхочо баркал аьлар цига дакъа лоацаш мел хиннарашта, цу бархӏ дийнахьа салоӏаш е наб еш боацаш, из лаха арабаьнна къехьегаш мел хиннарашта. Цо баркал аьлар МЧС болхлошта, моттигерча кӏалхарваккхара викалашта, Россе кхыча моттигашкара цига баьхка хиннача наха. Хизар лохаш хилар ерригача Кавказа дика къонахий.

Къаьстта Махьмуд-Ӏаьлас баркал аьлар республикан кхалнаха: ноаношта, йижарашта - цу деношка из кӏаьнк лохаш болча наха дӏайха даар цар лоаттадарах, уж хьаллацарах.

Гӏалгӏайчен Кулгалхочо ше тешаш ва аьлар, из бала царна ла могаргдолаш, Дала ше  цу бера даьй дегашта салоӏам бергхиларах.

Дала къахетам болба вай зӏамигача Хизарах. Дала ялсмален совгӏат долда цох. Цун даьна, нанна Дала сатем, сабар лулда. Амин!