Ший къамаьла юкъе Келаматанаькъан Махьмуд-Iаьлас теркалдир кхоачамбараш а кхоачамбоацараш а. БоаггIача боараме бехктокхаме болх дIахьораш белгалбеш, цIимхара къамаьл дир цо шоай болх лертIа хьабеш боацарех.

Бахархой бакъонашца дувзаденнараш лорадеш йоацача моттигий балха ше раьза воацилга дIахайтар мехка кулгалхочо.

Бахархоша тIакхихьача хаттарашта юкъе дар заIапхошта йоагIаш йола молхаш дIаялийтар, пенсеш, алапеш ханнахьа хьателар, бойла дисача берашта фусам къоастаяр, иштта наькъашкара хатараш лаьгIдалийтарца дувзаденнараш, мехка керда спорта доазош хьаделлар, бокъо йоацача моттигашка хьаIайна латта нувхий гувнаш дIадахар.

ХIара моттигаца бувзам болча хьакимашка хоаттам беш, кхоачамбоацараш хьаIар бахьан тохкаш, ма хулла сихагIа уж юстардахар тIадуллаш, дIабихьар болх вай Мехкадас. Белгалде деза, бахархоша шоай хаттараш иштта теркалдеш хилар лакха лоархIилга.

Келаматанаькъан Махьмуд-Iаьлас белгалдир, тахан мехкарча экономически, политически, вахара оагIонашца вай кагирхой тIатеIIа дакъа лоацаш хилар. Бахархошта къувлараш, цар сатем боабаьраш фуд тохкаш, царца бувзаме долаш, шоай болх бехктокхаме дIахьош,  наха гаргагIа хила, аьнна, тIадиллар Мехкадас хьакимашта.

 Республикан кулгалхочо хьоахадир тахан СВО доакъашхошта, цар дезалашта гIо лоаттадарах. Массайолча моттигаша цхьана, бувзаме йолаш, дIабахьа безаш лоархIаме болх из болга белгалдир Мехкадас.

ЖКХ оагIонцара доагIар, машинашцара йоал дIачутелара гIулакх мехка чIоагIа ледара латтилга теркалдир цо, из болх боаггIача боараме дIабахьара тIахьийхар цо бахархой. Хьакимашта хьалхадаьккхар, шоай болх бахархошца бувзаме болаш, цар хьашташ теркалдеш, дIакхахьа безилга.

 «Вай мехка сийдола, къахьегама тIера бола нах бах, къаьстта уж нах хьаллоацаш бехктокхаме, мехка хьал тоадара тIехьа къахьега деза вай», - белгалдир Макшарипа Махьмуд-Iаьлас. 

Деррига хаттараш дашха аьттув баланзар, бакъда массадарашка гIолла лакха тIахьожам беш болх дIахьоргба.

Иштта, нийсача, беркатеча наькъ тIа гIа боаккхаш мехка хьал тоадергда вай, боаггIача боараме къахьегаш хуле.