Шоай хургдолчун кӏийле яр, керда хӏама каралацар, из тешшаме хилийтар да цхьаболча наха дукхагӏа эшар.

Укх бӏарчча шера, цу ганзо ший тӏахьожам лоаттабераш  дика дакъа лоацаш хилар говзанча хьехамаш дӏахьоча. Царна довзийтар сапаш кхехкадар, гипсаца болх бар, догамаш дар, кхыдола  кхоллама балхаш дӏадахьар.

Цхьаболчарна из хьалхара бовзаш бола кулгаговзала болх ба, кхычарна шоай говзал кхы а дикагӏа йоаржаяр да, цунца цхьана цар таро хул дӏахо болх дикагӏа, тешамегӏа бе.

Таханарча денга кхоачаш, цхьаболча доакъашхоша хьакхоллаш да шоай кулгашца тамашийна гӏирсаш.

Гӏалгӏайчен бахархой таро я  автораша шоаш хьакхелла сапаш,  гипсах даь гӏирсаш, кулгашца дийца ювргӏаш эца, цул совгӏа, шоашта езаш йолча хӏаман заказ де.

«Тхо тешаш да, дика гӏулакхаш массанахьа дӏакхоачаш хила деза. Лоархӏаме да,  кхачанца новкъостал даь а ца ӏеш, наха хьалхашка нийслуш дола хаттараш кхоачашдара гӏо дар. Царех да, сага ший доалахьара хӏама дӏадоладеш хилча, цун новкъостал дар, цунца бувзабенна кхетам балар,  цо ший вахара хьал хувцаргдолаш, из ший низах тешаш хилийтар. Дала ше новкъостал долда наха цу тайпара гӏо деш барашта, шоай  таронашца царна кхоаненга бода никъ хьабеллаш болча наха, массаза а цох маьл дӏаязбеш хилба», – аьлар «Дикача наьха Клуб» яхача ганза кулгалхочо Матенаькъан Натас.

Вайх хӏаранена лов воай цӏагӏа хоза хилийта, массадолча хӏаман кхоачам лоаттабе. Тӏаккха хоза хетаций дика гӏулакхаш карагӏдоалараш гуш хилча?! Вахара халонаш йолча наха  новкъостал дар, из доккха гӏулакх да, цар дог хьастар, царна уллув хилар тахан царна эшар да. Цу наха лоархӏаме да кхычарца дагабалар, цудухьа оаха а иштта гӏо ду царна.

Саг, могашал яйна вале, е цун вахаре йоккхий халонаш нийслуш яле, вай декхарийла да цу наха гӏо де, вай юстара хила бокъо йолаш дац цу деша, тӏаккха мара могашал йола юкъарло дегӏайоагӏаш а хургьяц.

КДЛ доал деш болча наха каст-каста  шоай гӏирсаш ярмаркашка гойт, кӏезиг-кӏезига шоай таронаш йоаржаеш, цунца цхьана хьамсарча мехка культуран вахаре дакъа лацар а хул.

Дикача наьха клуб йовзаш я  ерригача республике гӏолла. Хала да юкъарлон тоабаша деш долча хӏаман мах оттабе ца ховш вола саг лаха.

Даьр тӏаэцаш хилар геттара нийса да. Цар таро хилар республикан массайолча  миӏингашка бахача, Магас-Шахьар йолчара дӏаболабенна Даби-Юрта кхаччалца болча шоаш дол деча наха новкъостал лоаттадар овлангара кердадаккха.