«Со - донор» яха проект боккха лоархӏам болаш, мах баь варгвоаца дика шийца доаржадеш я. Ийс шу хьалха дӏадоладир из дика гӏулакх къахетаме дегаш дола бахархой юкъеозаш. Цӏий, цӏийцара кхоачам лоаттабу дика доаржаде арабаьннараша мехкарча дарбанчешка, 2017-ча шера денз. Укх тӏехьарча шин шера проект, дуккхача бахархоша хьаллоацаш, яьржай.

1 800 совгӏа керда донораш ба цу юкъебаьхкараш. Ма доккха дика а да-кх из! Геттара чӏоагӏа лоархӏаме да тахан тӏехкацара тӏум дӏачутелаш дола гӏулакх. 800 саг ва, донорий регистра юкъеваьннар тӏехьарча хана. Из деррига теркалдеш, ала лов, вай мехкара адам вӏаший чӏоагӏа къахетаме, дег чура дика де ловш долга. Укх тӏехьарча шера цу оагӏонцара итт совгӏа болам дӏабихьаб вай мехка.

Бӏаь совгӏа саг ва, тӏехкацара тӏум дӏачутела раьза волаш, из гӏулакх хьаллаьцар. Тахан КДЛ из гӏулакх доаржадара тӏехьа дӏахьошбар боккха болх ба. Лекцеш, семинараш, ӏомабалар дӏакхухьаш, ма хулла дукхагӏа бахархой юкъебоалабу цар, из хӏама хьаллаца. Проекте геттара чӏоагӏа лоархӏаме да гӏо деш бараша паччахьалкхен, дешара, унахцӏенон, СМИ, дин оагӏонашцарча моттигашца болх лоаттабар.

Халача хьале эттача унахочоа гӏо де оттар мел доккха дика да, дувца ца дезаш, дика кхетаду вай; цунга хьежжа донор хила безам бараш дукхагӏа мел хул дикагӏа да вай къаманна. Иштта вай дика кхетаду, цӏий, тӏехкацара тӏум цхьаккха тайпарча кхыча хӏамашца хувца йиш йоацаш йолга, уж эшаш бола унахой дукха хул, цудухьа кӏалбисача наха цу миноте уж кхоачамаш хилар хам баь варгвоацаш да.

Къонабарашта, боккхийчарна юкъе ма хулла доаржаде дезаш дика да донор хилар. Чӏоагӏа гӏадвугаш да вай мехка из кхетадеш бола нах хӏара денна дукхагӏа хулаш латтар. Даь дика цӏаккха а довргдац! Могаш воацача сага новкъостал де оттар, шийна гонахьарча наха юкъе из доаржадар, адам тӏахьехар беркате гӏулакх да. «Со - донор» яхача проекта болх чӏоагӏа терко е езаш болга кхетаде деза вай массане!