1923-ча шера ахкан тӀехьарча бетта 30-ча дийнахьа Буро тӀа яьяр Ляля. Хьалхарча дунен тӀем тӀа дакъа лоацаш хиннача цӀихезача гӀалгӀай инарала Укуранаькъан Тонтий тӀехьенах хьаяьнна (йиӀий-йоӀ) Ляля моастагӀчун наькъаш теда араяьлар.

Машаре ха латтача хана, актриса хила безам болаш, театральни институте деша этта, хьалхара курс чакхъяккха кхийнадар цун. 1941-ча шера ахкан хьалхарча бетта 22-ча дийнахьа сесси дӀакъовлаш яр къона йоӀ. ВӀалла хье ца луш, шийца деша багӀачарца тӀема комиссариате яхе, тӀем тӀа болхачарца дӀаязъяйтар цо. Ший неш хиннача Смолянская Асяйца лорий йиший курсаш яьхар цар, сихагӀа тӀема моттигашка кхача.

18 шу даьнна мел бараш дӀакхувлар цу шера тӀем тӀа. Цар тӀема наькъаш дӀа-хьа къаьстар… Ася госпитале кхаьчар, Ляляйх зенитчица хилар. Тайп-тайпарча моттигашка бар уж, фашист вохавеш. ЧӀоагӀа кӀаьда оамал йолаш хинна Ляля тӀема аренашка бокъонца низ бола, деналах йизза саг хинна дӀаэттар, Керчь яхача шахьаре лаьттача тӀем тӀа зенитни йоккхача топа командир яр из.

ВӀалла а ше еха, кхераенна бӀарга ца яйташ, майрра немций бӀухой бохабеш, духьалйодаш яр гӀалгӀай йоӀ. Вай къаман наха тӀема аренашка гойтача деналах, исторе дукха яздаьд. ТӀом мел лаьттача моттигашка фашист кагвеш лаьттаб вай къаман яхь йола къонгаш. Шоай вахара уйла ца еш, шоашта уллуврча бӀухой дегаш ураувттадеш, тӀема наькъаш тийхкад цар. ТӀемо яь човнаш боарам боацаш йоккха хиннаяле а, юха когаш тӀа ураэтта, низах чӀоагӀбенна деша, болх бе, баха болабеннаб нах.

ТӀом чакхбаьнначул тӀехьагӀа, эпсарга маьре яха, кхо воӀ кхевеш яьхай Ляля. Театра доазон тӀа говзал хьокха дегӀа хиннадац цунна, бакъда, ше мел яхь йолаш я массанена дӀагойташ, беркате дезал ураоттабеш, дика цӀен-нана хинна яьхай из.