«Президента проекташка гӏолла доккхий хувцамаш хулаш, меттадоаладеш латт Магӏалбика хьал а. Дӏадахача шерашка 50 совгӏа йолча моттига куц эргадаьккхар шахьаре. Цу юкъе дар 17 ков, 32 лоархӏаме юкъара моттиг. Ше-ший аргӏагӏа дӏахьош ба из боккха болх. Тоаеш латтача моттигашка духхьала асфальт ӏобилла ца ӏеш, таханарча ханага хьежжа йола кӏезигагӏа ток йоаю лампаш ехк; берашта, спорта лаьрхӏа доазош къоастаду; иштта гӏашлой наькъаш тоаду дегӏа могашал эшаеннача наха а цига гӏолла лела паргӏата, кхерам боацаш хургйолаш», - дийцар  «Сердало» газетага Магӏалбикерча администраце.

Геттара башха хувцамаш деш кулг техар шахьаре керттера моттиг лоархӏаш йолча Орджоникидзе Серго парке. Иштта, боккха болх дӏахьош, меттадоаладир массехк урама хьал. Цу юкъе да Кавказски, Панфилова, Покрышкина, Шейха Мансура, Димитрова, Юбилейни, Бериславске оала урамаш. Хӏаьта дӏахо болх дӏахьош, тоае езача моттигех да Братски, Коммунистически, Аьдагӏий, Орцханаькъан оала урамаш. Бахархошца бувзаме болаш, онлайн-хоржамашка гӏолла баь къоастам ба из. Тӏатеӏӏа болх дӏахьош хиларо Магӏалбиках боккъал башха куц дола шахьар хьаергья кастта. Бахархой дегашта тоам беш, бӏарг хьоасташ хила еза тӏема сийлен шахьара моттигаш. Моллагӏча ханага кхаьча болча бахархошта цхьацца гӏулакх хьаллоацаш хила атто е гӏерт тахан шахьаре.

«Спорт- вахарера оамал» яхача федеральни проектага гӏолла, «Демографи» яхача къаман проектага гӏолла дикка хувцамаш деш латт Магӏалбике. Хӏаьта из чӏоагӏа лоархӏаме да шахьаре бахача наха. Ара физически культураца, спортаца бувзам лоаттабе йиш хургйолаш, боккха болх ба дӏахьош латтар. Шийна лайнача хана спорта лаьрхӏача доазон тӏа хьавена дог ӏаббалца ха яккха йиш йолаш ва моллагӏа вахархо. Серго цӏерах йола стадион, массане бӏарг тӏаотташ, тоаяь латт тахан.  Футбола доазув тоадеш къахьийгад цига, таханарча ханага хьежжа меттабоалабаьб ада къоастабаь никъ, спорта моттиг дикка ха дӏаяхь безам боагӏаш я тахан. Футбола тоабашта, атлеташта кийчо е; иштта бахархошта дегӏ сомадоаккхаш ада, ха дӏаяхьа паргӏата, дика моттиг я из.

Шахьаре бахача наха йоккха паргӏато я из. Тахан Магӏалбике вахача хӏара сага аьттув ба ший дега хьамсара йолча шахьара хӏама тоадеча дакъа лаца. Бекарга бетта 21-ча дийнахьа денз, берригача мехка доаржадаь доккхий хоржамаш да, хӏаьта Магӏалбик а юстара йисанзар. Тӏадоагӏача шера йоаржае лерхӏача дизайн-проекташка гӏолла хоржамашка дакъа лоацаш ба бахархой. Эггара хьалхарча оагӏонца, тоае еза, аьнна, хета моттигаш хьахаржа аьттув ба цар тахан. Гӏо деш лелараша хоржамашка дакъа лацар мишта хила деза хьалхадоаккх бахархошта цу оагӏонца царна цхьаккха хало хургйоацаш. Госуслуга порталага гӏолла zagorodsreda.gosuslugӏ.ru платформе цу хоржамашка дакъа лаьца, шийна хетар ала аьттув болаш ва тахан хӏара саг.

Бахархоша дакъа лацар чӏоагӏа лоархӏаме да, хӏана аьлча наха дикагӏа хов шахьаре малагӏа кхоачамбоацараш да, иштта дукхача хана денз тоае езача хьале кхаьчараш малагӏа моттигаш я. Из боккха аьттув луш гӏулакх долга белгалде деза тахан! Къаман, федеральни проекташка гӏолла дӏахьошдараш лоархӏаме хувцамаш да, цу хувцамашка гӏолла йовзаргйоацача хьале оттаеш, тоае йиш я моллагӏа моттиг. Тӏема сийлен шахьара – Магӏалбика куц хӏара денна эргадоалаш латтилга гуш да бахархошта а  хьаьшашта а.