Вежарий-Юртара №10 йола ишкол йоккха яц, бакъда дика цӏихеза я ший цӏагӏаръяраш санна йолча таронашца. Цу ишколе дешаш да начӏал дола бераш. Моттигера хьехархой коллектив белгалйоалаш я лакхача балха говзалца. Хьехархоша, кхетам баларал совгӏа, хӏара бера ший тайпара терко лоаттаю, начӏал дегӏадоаладе.

Тӏеххьарча шерашка, республике къаьстта йола терко лоаттаю дешара моттига. Укхаза хьакхеллад эшаш мел дола дешара хьалаш, кхоллам дегӏабоалабара, массайолча оагӏорахьара вай кхувш йоагӏа тӏехье хьаллацара эшар.

Из иштта хилар бахьан долаш, Вежарий-Юртара бераш таро йолаш да шахьара ишколашка дешаш долча берашта нийсса моллагӏа яхь дӏаяхьа.

Дийша баьннача дешархошта, хьехархошта, цар даьшта-ноаношта хьалхашка къамаьл деш, Келаматанаькъан Махьмуд-Ӏаьлас уж даькъалабийцар доккхача вахарга боалаш хиларца. Цо белгалдир, Тӏеххьара гургал - из духхьал дешарцара къасташ хилар хинна ӏац, из да вахара боккха никъ хьаэцаш хилар. Цига хоржаргья шоай хургйола професси, шоай вахара моттиг а хьалоацаргья.

Гӏалгӏайчен Кулгалхочо аьлар ше чӏоаггӏа тешаш хилар, хьамсарча ишколе хьаийца хьаькъал, хьехархоша, хьехамчаша, даьша-ноаноша хьаллоацаш хилар царна дӏахо накъадаргхиларах. Республикан кулгалхочо яхачох, вахара халонаш тӏехьаютача, паччахьалкхен экзаменаш дӏалуча, хьамсарча Даьхен, ерригача Россе хьашташ кхоачашдеш лакха толамаш доахача из эшаш хургда.

Лоархӏаме кхетаче дӏахьош, баркал аьлар дешара моттига кулгалхошта а. Махьмуд-Ӏаьлас ше къаьстта баркал аьлар ишкола кулгалхочун Меданаькъан Зинайна. Из дукхача шерашка къахьегаш хьайоагӏа ишколе, ший балхаца бехктокхаме а йолаш.

Республикан Кулгалхочо белгалдир, из хӏара бераца теркаме хилар, из ишкола дегӏайоалаяра цо доккха дакъа юкъедена хилар. Келаматанаькъан Махьмуд-Ӏаьлас яхачох, из санна болча кулгалхоша вӏашагӏболл Гӏалгӏайчен дешара оагӏув, дикагӏа дола хьехархочун ӏадаташ леладу.

Вежарий-Юртара цӏай чакхдаьлар массаза санна тӏеххьара гургал тохаш, дийша баьннарашца, хьаьшашца сурташ доахаш, юхебусача дешархой дегашка ишкола исторе сийрда лар юташ.