Сиха машинаш лелаш йолча моттиге, нийсбелар наькъа хьовзам. Массехк машин вӀашкакхийтар. Эггара хьалха цига тӀаера гӀалгӀай номераш йола сихача новкъостала машин, цу чу вар водитель Антошканаькъан Руслан, Хизаранаькъан Азамат, лораш Хазанаькъан Мухьмад, Курскенаькъан Адам. Вай лораша, шоаш миччахьа нийсбаларах, массаза из деш ма хиллара (цун масалаш дукха а да), сиха арабаьхар лозабаьраш машина чура, даггара ӀотӀаделхаш догӀа дар аьнна доацаш, царна новкъостал де эттар уж, МЧСера оарцагӀа боагӀараш тӀехьагӀо хьакхаьчар, 20 минот яьлча; хӀаьта моттигера сихача новкъостала машина ера 2 сахьат даьлча. Цу тайпара, гаьнарча ГӀалгӀайчера лораш эшача хана нийсбелар цу моттиге.

Вай мехкахоша яхачох, йоккхий човнаш хилар шин дезала, цу юкъе бераш а долаш. Виъ саг вар корта лозабаь а йийлла човнаш йолаш а, иштта маьженаш кагьяь а бар царех цхьабараш. Моттигера сихача новкъостала машина хьакхаьчача, юхерча дарбанче уж дӀабигар.

Новгороде хиннар хьахезача, ГӀалгӀай Республикан унахцӀенон министра Антошканаькъан Заремас лакха мах оттабир, ший балха новкъосташта карагӀдаьнначоа.

«Вай лораша дика гӀулакх а шоай балхах дика кхеташ хилар а гойтар, цига тӀанийсбаларах.

Доккха гӀулакх да из, ала йиш я цунах. Из ший професси йовзаш а езаш а хилара масал да», - аьлар Антошканаькъан Заремас.

Цар, Новгорода доазон тӀа нийсбенна, цига баьча балха мах оттабеш, наьха вахар кхерама кӀалхардоаккхача дика гӀо даь хилар дӀа а лоархӀаш, республикан министра декхараш кхоачашдеш йолча Антошканаькъан Заремас царна ахчан совгӀат де лаьрхӀар. Цу масало цӀаькха а хьагойтар; лорий болхлошта, дикал йолаш, эшача моттиге гӀо де ховш хилар, яхаш, дийцар ГӀалгӀай Республикан унахцӀенон Министерстве.

Вай кагийча наха-лораша, водителаша даьчох доаккхал де йиш я, уж къахьегаш болча моттиго санна, ерригача ГӀалгӀайчено.