Толамга кхачар
Карачаевск-Шахьаре ӏилман кхетачен юкъе дакъа лаьцар Гиренаькъан Мухьмада
Вай мехкарча паччахьалкхен университета магистрант вола Гиренаькъан Мухьмад Къарший-Черсий мехкарча таханарча Россе хьурмата доал дарах болча оагӏонцарча къонача говзанчий, студентий ӏилман кхетаче дакъа лоацаш хилар, вай республикан викал волаш. Цу гӏулакхо хьагойт, Къилбаседа Кавказе, Россе вай кагирхой ӏилман оагӏонца дувзаденнараш тоадара тӏехьа къахьегаш болга. Белгалде деза, гулбеннача цу кхетачен доакъашхоша шоай ӏилман балхаш гойталга.
Хӏанз 14-гӏа дӏахьош я цу мугӏарера кхетаче. Къарший-Черсий мехкарча Алиев ӏумара цӏерах йолча университете дӏайихьар из лоархӏаме кхетаче укх шера. Цига гулбеннабар Мсквера, Санкт-Петербургера, Ростовера, Шолжа-Гӏалий тӏара, Магасера, Буро тӏара, Самарера викалаш.
«Аз чӏоагӏа доаккхал ду цу моттиге сай дакъа лаца аьттув хиларах, йоккхача кхетаче къамаьл де бокъо яларах. Цига се дӏавехар, дӏахо айса хьоча къахьегама наькъ тӏа накъадаргда, аьнна; дог тийша ва со. Са дега боккха тоам баьб цу гӏулакхо. Сай кафедранна а доккха баркал оал аз тахан. Цар оагӏув хьаллоацаш хиларах; иштта лоархӏаме йолча кхетаче дакъа лаца, дӏавовзийта аьттув хилар тахан.
Тха оагӏув хьаллоацаш, дог ураоттадеш мел хиннарашта а баркал аргдар аз дег чура. Цигара хьаийцар, теркалдаьр эшаш ха оттаргья са балха юкъе, сона лоархӏме да къаьстта из хӏама», - дийцар вай мехкахочо. Хьурматаца, доал дара оагӏонца, хӏама доаржадарца дувзаденнараш хьалхадоахаш; болх бар ӏилман кхетаче дӏахьош хиннар. Оагӏой бетта 5-ча денгара 6-ча денга кхаччалца, йоккха культуран оагӏонцара программа яр царга Къарший-Черсий мехка хьежаш.
Цӏихеза суртанча хиннача Крымшамхалов Пашай Ислама музее-цӏагӏа воккхача говзанча балхаш, цун вахара наькъаца дувзаденнараш дайзар викалашта. Цӏихезача альпинисташа лелаяь хӏамаш, тӏема ханашца дувзаденнараш, совгӏаташ, тахан корадоагӏаш доаца книжкаш дайра царна лоамаш тӏа бувларашта хетаяьча зале.
Иштта цига дӏайихьар «Селханарча ханагара кхоаненга» яха пхьараша хьаяьча хӏамай куц гойта кхетаче-экскурси. ДПИ, дизайна кафедра кулгалхо йолча Эсеккуева Казимарас дӏайихьар из хьаьшашца. Селханарча вахаре хинначар таханарчарцара цар бувзам бовза аьттув хилар къонабарий.
«Вай вошал леладеш йолча республике тхоаш мишта тӏаийцар дувца лов сона… Чӏоагӏа безаме, дег тӏа йӏовхал йоссийташ, цхьа ший тайпара хоза чакхдаьлар деррига а. Гуш дар цу наьха тхоца лерхӏам болга. Иштта догдика, цӏена нигат дола, беркате нах хӏара денна бетталуц вахара наькъ тӏа. Къаьстта чӏоагӏа дег чу дийшар сона сай къамах лаьца цар аьнна дешаш», - белгалдир Гиренаькъан Мухьмада.
