Бокъонаш лораераша закон лорадеш санна, шоай сий а лораду. Цар балха ди боарам болаш дац; бакъда цунга хьежжа доацаш, шоай Даьхенна хьалхашкара декхар дизза кхоачашду цар.

Цхьайолча хана, царна баркал ала безам хул, Iуйрийна паргIатта сомавала йиш хиларах.

Шолжерча ЛаьрххIача коррекционни ишколе-интернате хьайийллача музея оагIоно хьагойт, ГIалгIайчен беррига бахархой баркал оалаш хилар. Цига го йиш я, ЛаьрххIа йола операци дIахьош, «Беркут-Юг» ОМОНа бейнача бIухоех бола хоам, цар дезалашкара сурташ, цар леладеш хинна кхыдола гIирсаш. Цу ерригача материалаш та юкъе я уж боккъонцахьа бола турпалхой хилар хьагойташ йола оагIув. Цар цIераш вай дегашка яхаргья, вай мел дах, уж иштта даим хургья мехка исторе оагIон тIа. Росгварде Урхалленна кулгалхочо Буражанаькъан Микаила белгалдаьча беса: «Бераш ха дезаш да мехка вахаре шоаш дакъа лаьцалга, иштта царна бовза беза шоай турпалхой, цар цIераш, Даьхенна уж тешшаме къонгаш хилар».

Экскурси дIахьош, ишкола-интерната дешархоша терко тIаяхийтар тIабувхабеча гIирса. Уйла ел, шоана хьалхашка улл бронежилет, из цхьан хана тIем тIа лоархIаме дакъа дIалоацаш хиннай. ХIанз укх дунен тIа цун да воацаш ва, бакъда бронежилет эскара вахара тешал да. Цу моча тешало цхьайолча хана дог тохадолийт, хIана аьлча уж вайца бац, бакъда кхыча оагIонга диллача доккхал а дайт, иштта майра бIухой вай хиларах.

«Тхона хетачох, цу дешара моттиге кхебеш болча вай дешархошта, кхычарна мо тха доазон болхлоша терко лоаттайича бакъахьа яр. Царех хIаравар из хьал ший тайпара довза гIерташ хул, къаьстта цудухьа, хIара тхоаш мел доагIача хана, ма хулла дукхагIа башхало йолаш хилийта хьож тхо тхоай болх», - аьлар полице инарал-майора Буружанаькъан Микаила.

Латташ йола ха моллагIа хиларах, вай мехкахошта карагIдаьнначох дувца деза кагирхошта, уж шоай мах баь варгвоацача хьинарца, наха машар, иразе кхоане хилийта гIерт.