Дика хаоттам
40 шу хьалха лаьтта хаоттам дагабохийтар мехкахошта лакха диллача лайво
Ӏан тӀехьара бутт Ӏадика ювца кийчбеннача хана, дагадоацаш, лакха, цхьайолча моттигашка 20 см кхоачаш, лоа диллар вай мехка. Мехка бахархой вахарера гӀулакхаш а дагадоацаш хувцаделар. Наькъашкара хьал лорадеш болча болхлошта тӀалатта низ лакхагӀа ба, машинаш, гӀаш болхараш лоралуш хила беза денош да кхаьчараш.
Наькъашка хатараш хинна моттигаш хилар вай мехка; шортагӀа лела, яхаш, кхайкарал дой а. Бахьан - хаоттам хувцабеннаб аьнна доацаш, машинаш боарамал тӀехбаьнна масса хехкар. ЖКХ къахьегамхошта а шортта болх ӀотӀакхийтар, ди-бийса доацаш, наькъаш цӀендеш лел уж. Бийсанна гӀор увтташ хиларах, фийла хила безаш хилар тока, газа оагӀоний болхлой, МЧС. Бакъда, берашта доккха цӀай хиннад диллача лайх.
Миско шоай соалозашта бӀарахьежаш, Ӏан тара доаца денош даа Ӏема бераш, арара чудаха ца кхеташ; хехкалуш, лай мажаргаш детташ, ГӀордада веш кхест. Иштта лоа диллара раьза бола боккхийбараш а дукха ба. Ӏа Ӏан тара хилча хозагӀа хет царна, лоа уллаш хилча фо а цӀена долга хоалуш хул, духхьал садаха аравала догьотт цӀагӀара.
Ахкан Ӏимеца денош хьаэттача, цӀенача фех хьагаш хул вай дерригаш, хӀана аьлча гобаьккха гӀетташ доми садикъаи хул. ЦӀаьхха, хьаэттача шелало, Ӏа кхоачалуча хана, шоай фусамаш дикагӀа йӀохае оттабир нах. Иштта ба Даьла низ, Цунгара да деррига! Массане тахан геттара чӀоагӀа айдаь дувцаш дола геттара чӀоагӀа йӀовхал оттаргья яхар, дагадоацача хана бирсача шелало юстартатта йиш я.
Иштта да-кх дунен хӀама, моллагӀча хаоттамга кийча хила деза вай. Шовзткъа шу хьалха доагӀаш хинна Ӏа иштта хулар, гувнаш тӀа, массайолча моттигашка лакха лоа уллаш, тховнех, корашта кӀалха бӀаьстан денош хьахилча мара ца башаш ша уллаш; когашта кӀалха бирсо «гӀарчӀ, гӀарчӀ», яхаш. Иштта дола Ӏа вайцига массахана отташ дар, бакъда, тӀехьарча ткъаь шера из дицденнад вайна.
Цу дерригача хӀамаша хьалхадоаккх вайна Дала хьаденна Ӏалам лорадеш, хам беш лоаттаде дезилга. Вай дерригаш, цхьан кема тӀа хайша, хи тӀагӀолла долхаш да. Вай массане юкъара моттиг я ер, цудухьа хи чу, аренашка, хьасташка, кхаьч-кхаьчача нувхаш ца йоаржаеш, экологе хьал лорадеш, цӀенхашта уйла еш, хила деза вай дерригаш. Вай къаман наха къаьстта лораде деза уж гӀулакхаш.
Ма хулла дукхагӀа гаьнаш дӀайогӀа, хин моттигаш цӀенъе, аренаш лорае. БӀаьстан ха хьаэттача; зиза техача Ӏажаша, боалаша дог хьоастаргда вай тӀаккха, кӀарцхала мерзача зизай хьаж кер бизза чуюжаргья, хӀаьта гуйран хана шортта чуэца беркат хургда, сомех, хаьсех лармаш хьалдиза йиш хургья вайга. Дала дегӀадале, ший кӀай кхоллар тоссаш, лай чоалпаш легаеш, Ӏа а юхакхоачаргда.
